Avqustun 18-də Argentina klub futbolunda növbəti mübarizəyə start verildi. Ölkə çempionatının iyulun 31-də keçirilən son oyunlarından 18 gün sonra Liqa Kuboku (LK) başladı.

“Football-plus.az” xəbər verir ki, 2020-ci ilin martında koronavirus pandemiyasına görə dayandırılan ölkədaxili yarışlar həmin il oktyabrın 30-da ilk dəfə təşkil edilən LK ilə bərpa olunmuşdu. Argentina Futbol Assosiasiyası pandemiya dövründə ən yüksək divizionda növbəti mövsümə vaxtında start verə bilmədiyi üçün yeni formatda Liqa Kubokunun təşkilinə qərar vermişdi. Sonradan dünyasını dəyişən əfsanəvi futbolçu Dieqo Maradonanın adı verilən yarış 2021-ci il yanvarın 17-də keçirilən finalda penalti seriyasında “Banfild”ə qalib gələn “Boka Xuniors”un qələbəsi ilə sona çatmışdı. Onu da qeyd edək ki, hələ bir neçə il əvvəl pandemiyaya görə yüksək liqanı heç bir komandanın tərk etməyəcəyinə qərar verilmişdi. Futbol qurumu əvvəlcə 24 komandanın iştirakı ilə keçirilən LK-nı qısa zamanda sona çatdırmağı zəruri saymışdı. Turnirin startı 2021-ci il fevralın 13-də verilən ikinci mövsümündə isə 26 komanda iştirak etdi: “Platense” və “Sarmyento” da ən güclülər sırasında yarışmaq hüququ qazandı. Turnir iştirakçıları iki qrupa ayrıldılar. Klublar əvvəlcə birdövrəli sistemlə yarışdılar. 13 turdan ibarət olan qrup mərhələsinin sonununda - qruplarda ilk dörd yeri tutan komandalar 1/4 finala vəsiqə qazanmaqla mükafat uğrunda mübarizə apardılar. İyunun 4-də Liqa Kubokunun ikinci mövsümünün finalı keçirildi. Həlledici oyun tərəflərdən birinin inamlı qələbəsi ilə sona çatdı. Finalda “Rasinq”i 3:0 hesabı ilə məğlub edən “Kolon” tarixində ilk dəfə turnirin qalibi oldu. LK-nın 3-cü mövsümündə də 26 komanda iştirak etdi. Amma format dəyişdi. Klublar birdövrəli sistemlə mübarizə apardılar. Yekun turnir cədvəlində ilk yeri tutan komanda çempion sayıldı. Bu adı isə “Boka Xuniors” qazandı.

LK-nın 4-cü mövsümündə 28 komanda iştirak edəcək. Bu komandalar bir neçə həftə əvvəl sona çatan ölkə çempionatının iştirakçılarıdı. Format yenidən dəyişib. İştirakçılar birdövrəli sistemlə iki qrupda yarışacaqlar. Amma təşkilatçı qurum əlavə bir turun keçirilməsini də lazım bilib. Başqa sözlə qrup mərhələsi 13 deyil, 14 turdan ibarət olacaq. Bu mərhələyə noyabrın 26-da yekun vurulacaq. Sonra qruplarda ilk 4 yeri tutacaq komandalar arasında 1/4 final matçları təşkil ediləcək. Daha sonra yarımfinal və final oyunları ilə LK-nın qalibi müəyyənləşəcək.
Yeni mövsümün ilk turunda qeydə alınan nəticələrə nəzər salarkən diqqəti cəlb edən əsas məqam ölkənin son çempionunun startdaca büdrəməsidi. “River Pleyt” səfərdə “Arxentinos Xuniors”dan xal ala bilmədi. Martin Demiçelisin komandası 2:3 hesabıyla məğlub oldu. Ölkənin digər nəhəngi “Boka Xuniors” isə öz meydanında “Platense”yə 3:1 hesabıyla qalib gəldi. Son 16 ili Avropada keçirən 36 yaşlı uruqvaylı hücumçu Kavani yeni komandasında qol hesabını açdı. Ölkə çempionatının son mövsümünün gümüş mükafatçısı olan “Talyeres de Kordoba” səfərdə “Ximnasiya”ya üç, bürünc mükafatçı “San Lorenso” isə “Lanus”a bir cavabsız qolla qalib gəldi.

qrup mərhələsi, 1-ci tur
Arxentinos Xuniors - River Pleyt 3:2
Di Çezare, 11. Qondou, 44; 57 – Palavesino, 27. Barko, 41.
Ximnasiya - Talyeres de Kordoba 0:3
Bustos, 17. R.Sosa, 84-p.; 88.
Lanus - San Lorenso 0:1
Bareyro, 69.
Boka Xuniors – Platense 3:1
Sebalyos, 28. Kavani, 55. Medina, 90+4 – Morqantini, 61.
Belqrano – Estudiantes 2:1
Passerini, 30-p.; 62 – Boselli, 52.
Union – Rasinq 1:1
Morales, 57 – Qalyeqo, 10.
İndependyente - Kolon 0:1
Espinola, 76.
Veles Sarsfild - Barrakas Sentral 1:0
Prado, 35-öz qapısına.
Arsenal - İnstituto 0:1
A.Martines, 21.
Sarmyento - Tiqre 2:0
F.Paredes, 23. Kalkaterra, 63.
Rosario Sentral - Atletiko Tukuman 0:0
Atletiko Urakan - Banfild 2:0
Kokkaro, 74. Kordero, 88-p.
Nyuellz Old Boyz - Sentral Kordoba 2:0
Kanto, 35-öz qapısına. B.Agirre, 82.
“Defensa y Xustisiya” – “Qodoy Krus” oyunu sentyabrın 11-nə təxirə salınıb.
Bombardirlər: Qondou (Arxentinos Xuniors), Passerini (Belqrano), R.Sosa (Talyeres de Kordoba) – 2.