Yanvarın 28-də Argentina klub futbolunda növbəti mübarizəyə start verildi. Son mövsümdən 94 gün ötəndən sonra ölkə çempionatı yenidən başladı.

Əvvəlcə Argentinanın əsas klub turnirinin reqlamentini xatırladaq. Ölkə çempionatında ötən mövsümdə olduğu kimi yenə 28 komanda iştirak edəcək. İştirakçılar birdövrəli sistemlə mübarizə aparacaqlar. Yekun turnir cədvəlində ilk yeri tutacaq komanda çempion sayılacaq. Təqvimə əsasən sonuncu - 27-ci turun oyunları iyulun 30-na - bazar gününə təyin olunub. Son mövsümü 28-ci yerdə başa vuran “Aldosivi” yüksək liqanı tərk edib. Bu komandanı 2-ci divizionun qalibi olan “Belqrano” əvəzləyib. Ötən mövsümü 10-cu yerdə başa vuran “Patronato” da yüksək liqada deyil. Bu mövsüm üçün lisenziya ala bilməyən komandanın yerini 2-ci divizionun ikincisi “İnstituto” tutub.

Yeni mövsümün Rosario şəhərində keçirilən ilk oyununda ev sahibi qalib gəldi: “Rosario Sentral” – “Arxentinos Xuniors” matçı 1:0 hesabı ilə nəticələndi. 19-cu dəqiqədə hesabı açan 27 yaşlı hücumçu Kandia mövsümün ilk qolunun müəllifi oldu. Ümumiyyətlə, ilk turun 14 oyununda qeydə alınan nəticələrin yalnız 4-ü meydan sahiblərinin xeyrinə oldu. 4 matç heç-heçə bitdi, qonaqlar isə 6 qələbə qazana bildilər.
Açılış turunun mərkəzi oyunu Buenos Ayresdə keçirildi. Son çempion “Boka Xuniors” ötən mövsümü 5-ci yerdə başa vuran “Atletiko Tukuman”ı qəbul etdi. Ev sahiblərinin aşkar üstünlüyü şəraitində keçən matçın nəticəsini bir qol müəyyənləşdirdi: 69-cu dəqiqədə Sebastyan Vilyanın ötürməsini Oskar Romero dəyərləndirdi.

Son mövsümdə çempionluq şansını dramatik şəkildə əldən verən vitse-çempion yeni “futbol ili”nə heç-heçə ilə başladı. “Rasinq” evdə “Belqrano” ilə heç-heçə oynadı. Fernando Qaqonun komandası bütün oyun komponentlərində üstün olduğu rəqibini qapıya dəqiq zərbələr planında yalnız 2:1 hesabı ilə üstələdi. Qonaq komandanın arxa xəttinin mükəmməl oyunu da qeyd edilməlidi.

Ölkə çempionatının bürünc mükafatçısı “River Pleyt” isə yeni çalışdırıcı ilə uğurlu start götürdü. Xatırladaq ki, ötən ilin dekabrında Marselo Qalyardonun müqaviləsi yenilənməmiş, komandaya 8 illik fəaliyyəti ərzində daxili və beynəlxalq turnirlərdə 14 titul qazandıran 47 yaşlı mütəxəssis baş məşqçi vəzifəsindən ayrılmışdı. Ölkə nəhəngini bundan sonra sabiq oyunçusu çalışdıracaq. Paytaxt klubunun rəhbərliyi Qalyardonun yerinə Martin Demiçelisi təyin edib. 2019-21-ci illərdə “Bavariya”nın U-19, 2021-ci ildən isə əvəzedicilərdən ibarət komandasını çalışdıran 42 yaşlı mütəxəssis Münhen klubunu dekabrda tərk etmişdi. Buenos Ayres klubunun yetirməsi olan Demiçelis “milyonçular”ın şərəfini 2000-03-cü illərdə qoruyandan sonra 7 il “Bavariya”da top qovub. Futbolçu karyerasını 2017-ci ildə “Malaqa”da başa vuran Martin həmin il İspaniya klubunda baş məşqçinin köməkçisi təyin edilib. Argentina yığmasında 51 oyuna 2 qol vuran sabiq yarımmüdafiəçi “River Pleyt”də yeni səhifəni qələbə ilə açdı. Demiçelisin komandası səfərdə “Sentral Kordoba”nı 2:0 hesabıyla məğlub etdi. Matçın qəhrəmanı qola və məhsuldar ötürməyə imza atan 21 yaşlı hücumçu Solari oldu.

1-ci tur
Boka Xuniors - Atletiko Tukuman 1:0
O.Romero, 69.
Rasinq – Belqrano 0:0
Sentral Kordoba - River Pleyt 0:2
İ.Fernandes, 45. Solari, 69.
Rosario Sentral - Arxentinos Xuniors 1:0
Kandia, 19.
Defensa y Xustisiya - Atletiko Urakan 2:4
N.Fernandes, 45+3. Barbona, 49 – Etse, 7. Qudinyo, 43. Kordero, 82. X.Qarsiya, 86.
San Lorenso - Arsenal 1:0
Vomberqar, 57.
Estudiantes – Tiqre 1:2
Boselli, 57 – Retegi, 42; 74.
Talyeres de Kordoba – İndependyente 0:1
Martino, 52-öz qapısına.
Platense - Nyuellz Old Boyz 2:2
Morqantini, 27. Baldassara, 62 - Sordo, 11. F.Qonsales, 65.
Kolon - Lanus 1:2
X.Benites, 82 – De la Veqa, 12. Orosko, 72.
İnstituto - Sarmyento 0:0
Barrakas Sentral - Qodoy Krus 0:1
Abreqo, 25.
Banfild - Union 0:0
Veles Sarsfild - Ximnasiya 3:1
Xanson, 26. Bou, 53; 57 – Enrike, 67.
Bombardirlər: Bou (Veles Sarsfild), Retegi (Tiqre) – 2.