Mayın 11-də Argentina klub futbolunda növbəti mübarizəyə start verildi.

“Football-plus.az” xəbər verir ki, Liqa Kubokunun (LK) finalından 6 gün sonra ölkə çempionatının yeni mövsümü başladı.

Əvvəlcə Argentinanın əsas klub turnirinin reqlamentini xatırladaq. Ölkə çempionatında son mövsümdə olduğu kimi 28 komanda iştirak edəcək. İştirakçılar birdövrəli sistemlə mübarizə aparacaqlar. Yekun turnir cədvəlində ilk yeri tutacaq komanda çempion sayılacaq. Təqvimə əsasən sonuncu - 27-ci turun oyunları dekabrın 15-nə təyin olunub. Ölkə çempionatı LK-nın son mövsümündə iştirak edən komandaların mübarizə meydanına çevriləcək. Qeyd edək ki, Argentina birinciliyində 5-ci turdan sonra fasilə yaranacaq. ABŞ-də təşkil olunacaq Amerika Kubokuna görə çempionat iyulun 21-də bərpa olunacaq.

Yeni mövsümün ilk turunda diqqəti daha çox cəlb edən fakt 14 oyundan yalnız birinin heç-heçə nəticələnməsi oldu. Kordoba şəhərində baş tutan həmin matçı izləməyə dəyərdi. Ona görə ki, “Belqrano” – “Rasinq” duelində ümumilikdə qapılara 8 top vuruldu. 4:4 hesabıyla bitən oyunun qəhrəmanı Xara oldu. “Belqrano”nun het-trik edən 35 yaşlı hücumçusu ilk turdan bombardirlərin yarışında liderliyi ələ aldı.

Açılış turu çempionatın son mükafatçıları üçün fərqli alındı. Son çempion “River Pleyt” evdə “Sentral Kordoba”nın qapısından 3 cavabsız top keçirdi. Martin Demiçelisin komandasının işini Lakuydaynın asanlaşdırdığını da qeyd edək. Qonaqların oyunçusunun 24-cü dəqiqədə qırmızı vərəqə alması “milyonçular”ın böyükhesablı qələbəsinə şərait yaratdı.

Vitse-çempion da yeni “futbol ili”nə qələbə ilə başladı. “Talyeres de Kordoba” səfərdə “İndependyente”ni 3:1 hesabı ilə məğlub etdi. Ölkə çempionatının bürünc mükafatçısı “San Lorenso” isə ilk turda xal qazana bilmədi. Paytaxt komandası “Deportivo Riestra”ya minimal hesabla uduzdu.

“Boka Xuniors”un mövsümə uğursuz başladığını da qeyd edək. Dieqo Martinesin komandası səfərdə “Atletiko Tukuman”ın yeganə qoluna cavab verə bilmədi.

1-ci tur
River Pleyt - Sentral Kordoba 3:0
Kolidio, 6; 30. Barko, 86.
İndependyente - Talyeres de Kordoba 1:3
Katalan, 10-p. – Xirotti, 8. Portilyo, 81. R.Sosa, 90+7.
Deportivo Riestra - San Lorenso 1:0
X.Errera, 7.
Atletiko Tukuman - Boka Xuniors 1:0
Koronel, 29.
Tiqre - Estudiantes 0:1
M.Mendes, 10.
Sarmyento - İnstituto 1:2
Dubersarski, 48-öz qapısına – S.Rodriges, 40; 55.
Arxentinos Xuniors – Rosario Sentral 3:2
F.Alvares, 21. Leskano, 45+7-p. Qondou, 59 – Modika, 6. Eredia, 41-öz qapısına.
Nyuellz Old Boyz – Platense 2:0
Kassiabue, 82. B.Agirre, 90+3.
Atletiko Urakan - Defensa y Xustisiya 3:1
Pussetto, 45-p; 90+3. Fertoli, 58 – Alanis, 81.
Qodoy Krus - Barrakas Sentral 0:1
A.Dominges, 84.
Belqrano - Rasinq 4:4
Xara, 9; 81; 85. Troylo, 77 – Losada, 12-öz qapısına. R.Martines, 28-p.; 56. Siqali, 45+2.
Lanus - İndependyente Rivadaviya 0:2
Petrasso, 9. Reali, 83.
Ximnasiya - Veles Sarsfild 3:1
Kastilyo, 39. Abaldo, 50. Kolaso, 68 – Pelleqrini, 82.
Union - Banfild 1:0
Domina, 88.
Bombardir: Xara (Belqrano) - 3.