''Fənərbaxça''nın əfsanələrindən olan Ogün Altıparmakdan üzücü xəbər gəlib.

''Football-plus.az'' az xəbər verir ki, sabiq futbolçu və məşqçi 86 yaşında dünyasını dəyişib. İlk peşəkar klubu ''Karşıyaka'' olan Ogün Altıparmak ''Fənərbaxça''nın şərəfini iki fərqli dönəmdə (1963-68, 1969-71) ümumilikdə 7 il qoruyub və 4 çempionluq yaşayıb.

Maraqlıdı ki, 1963-də yolu ilk dəfə ''Fənər''ə düşəndə onun ayağı qırıq idi. Bu transferin baş tutmasında dönəmin tanınmış iş adamı Kadir Hasın böyük əməyi olmuşdu. Ogün Altıparmak 1970/71-də 16 qolla bombardir olmuş və Türkiyə çempionatı tarixinə ilk ''Fənər''li bombardir kimi düşmüşdü. 1968/69-da ''Fənər''in Çempionlar Kubokunda ''Mançester Siti''ni evdə 2:1 yenərək mərhələni adladığı oyunda iki qoldan birini məhz o vurmuşdu. Altıparmak bir il (1968-69) ABŞ təmsilçisi ''Vaşinqton''da da forma geyib.

Öz dönəminin ən məhsuldar oyunçusu olan Altıparmak 1959-71-ci illərdə Türkiyə çempionatında forma geydiyi 306 qarşılaşmada aktivinə 106 qol yazıb. O, turnirin tarixində 100 qol həddini aşan 5-ci futbolçu olmuşdu.

Türkiyə yığmasında isə 32 oyun keçirərək aktivinə 6 qol yazıb. Bu oyunlardan ikisində komandanı meydana kapitan qismində çıxarıb. Baş məşqçi kimi ''Girəsunspor'', ''Karşıyaka'', ''Ərzincanspor''u çalışdıran Altıparmak 1986-88-ci illərdə ''Fənər''də yönətici kimi də çalışıb.

ƏLİ