''Trabzonspor''un sabiq oyunçusu və baş məşqçisi, klubun tarixinə damğa vuran isimlərin başında gələn Ahmet Suat Özyazıcı dünən 87 yaşında dünyasını dəyişib.

Özyazıcı ilk növbədə Türkiyə futbolunda İstanbul nəhənglərinin hegemonluğuna son qoyması ilə tanınırdı. Belə ki, 1975/76-ya qədər yalnız 3 nəhəng çempion olurdu və həmin mövsüm qaradənizlilər tarixlərində ilk dəfə ölkənin ən güclüsü adını qazandılar. Trabzon təmsilçisi bu məşqçi ilə daha 3 dəfə (1976/77, 1979/80, 1983/84) çempionluq sevinci yaşadı. Yəni klub tarixinin 7 çempionluğundan 4-ü bu mütəxəssisin adı ilə bağlıdı. Çempionluq sayına görə Özyazıcı yalnız Fatih Terimdən (8) geri qalır. Ümumilikdə bu məşqçi ''bordo-mavililer''i 8 fərqli dönəmdə çalışdırıb və 14 titul qazanıb.