''Fənərbaxça'' ilə ''Hall Siti'' arasında Ozan Tufan ilə bağlı uzun müddətdi aparılan danışıqlar nəhayət uğurla başa çatdı.

Türkiyəli şoumen və iş adamı Acun Ilıcalının sahibi olduğu çempionşip təmsilçisi dünən Ozanla ''3+1'' illik müqavilə imzalandığını rəsmən açıqladı. Keçidin detalları və 27 yaşlı yarımmüdafiəçinin yeni klubundakı illik məvacibi barədə məlumat verilmir. Türkiyə mətbuatının yazdığına inansaq, ''Fənər'' bu satışdan təxminən 5 milyon avro qazanacaq. Qeyd edək ki, ''Bursaspor''un yetirməsi olan Ozan Tufan 2015-dən ''sarı-lacivərdlilər''in şərəfini qoruyurdu. Onun bu klubdakı karyerası çox enişli-yoxuşlu keçdi. Tufan 2018/19-un ikinci dövrəsini ''Alanyaspor''da, ötən mövsümün ilk dövrəsini ''Uotford''da icarə əsasında keçirmişdi. Ümumilikdə Ozan ''Fənər''in heyətində forma geydiyi 182 rəsmi oyunda 21 qol, 24 məhsuldar ötürmə ilə yadda qaldı. Türkiyə yığmasında isə 65 oyun keçirib və 9 dəfə fərqlənib. Ən maraqlısı odu ki, bu futbolçu 7 il ''Fənərbaxça'' kimi nəhəngin şərəfini qorusa da, onun karyerasında hələ də qazanılmış titul yoxdu! Ozan Tufan həm də ''Hall Siti'' tarixinin ilk türkiyəli futbolçusu oldu. ''Pələnglər'' daha öncə ''Fənər''dən iranlı forvard Allahyar Səyyadmaneşi də transfer etmişdilər.