"Qarabağ" Misli premyer-liqasının evdə keçirilən 20-ci tur matçında "Turan Tovuz"a uduzdu - 1:2.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Məğlub olmaq istəməzdik. Təəssüf ki, uduzduq. Futbolçularım demək olar ki, 90 dəqiqə oyuna nəzarət etdi. Futbol bəzən belə çirkin tərəflərini göstərir. Bəzən bir dəqiqə içində hər şey alt-üst olur. "Turan Tovuz"u təbrik edirəm.

- Son iki oyunda künc zərbəsindən 4 qol buraxmısız. Bunun üzərində çalışırsız?
- FKSB ilə oyundakı problemlərdən danışdım. Bu oyuna gəlincə, qapıçı meydançasında cərimənin necə olduğunu bilirəm. Qapıçını 5 nəfər əhatəyə alırsa, topa çıxmağa qoymursa və buna reaksiya vermirlərsə, buna nə deyə bilərəm? Rəqib Şahruddini əllə, bədənlə itələyir. Bu, tək indi deyil. Neçənci dəfədi ki, belə olur. Biz həmişə qalib gələn komandanı təbrik etmişik. Lakin belə hallara reaksiya verilmirsə, əlbəttə ki, daha artığını edəcəklər. Qapıçı öz meydançasında toxunulmazdı. Razıyam ki, ikinci qolda səhvə yol verdik. Məncə, hakimlər belə epizodlara sadə yanaşır. Camaatın burda haqqı, əziyyəti var. Belə olmaz axı! 12 yaşlı uşaqlara hakimlik etmirsən ki! Düz nədisə, onu et. Demək olar ki, bütün oyunlarda belə hallara rast gəlirik. Təbii ki, məğlubiyyətin səbəbi bu deyil. Lakin iki əllə futbolçumuzu itələyirlər. Bu üzdən əsəbləşdim... Epizoda bəlkə 10 dəfə baxdım. Faiq Hacıyevin tapşırığı ancaq qapıçı ilə oynamaqdı. Başqa işi yoxdu! Şahruddin topa yaxınlaşmaq istəyir, Faiq onu itələyir. Bu, cərimə deyilsə, nədi? Top göydə olanda oyun saxlanılmalı idi... Nəysə... Rəqibi təbrik edirəm. Çox istəkli idilər.

- Hakimlərin qərəzli olduğunu düşünürsüz?
- Yox. Məncə, məsuliyyətsizdilər! Cavid Cəlilov qaydaları bilir. Əvvəlki komitə sədri ilə gəlib qanunları izah edirdi. Camaat aylardı ki, əziyyət çəkir... "Qarabağ" və ya "Neftçi" olsun. Bunun fərqi yoxdu.

- İcraiyyə Komitəsində bu məsələni qaldıracaqsız?
- Məncə, ehtiyac yoxdu. Ora bunu qabartmağın yeri deyil. Futbolçularımızdan tələb edirik. Məsuliyyət çox vacib şeydi. Aldığımız əməkhaqqına layiq olmalıyıq. Çünki, ailəmizi bu işlə dolandırırıq. Hamı bu cür yanaşmalıdı. Hakimlər də məsuliyyətli olmalıdı.

- Rəqibin penalti gözlədiyi epizodlar da var idi. Bunları necə şərh edərdiz?
- Olsaydı verərdilər. Saxlamazdılar.

- Musa meydandan çıxandan sonra Benzya hücumda oynadı. Bundan sonra da onu həmin mövqedə görə bilərik?
- Bütün oyunlarda yox. Hansısa oyunlarda ola bilər.

- Rəsmi danışıq apardığınız futbolçular var?
- Yox. Bir-iki futbolçuyla maraqlandıq. Dəqiq desək, özləri ilə danışdıq. Amma nəticə hasil olmadı. Hansısa futbolçuya görə rəsmi təklif göndərilməyib.

– Oyunçularınızın psixoloji durumunu necə dəyərləndirərdiz?
– Məncə, futbolçular çox yaxşı idilər. Sadəcə bir az daha hazırlıqlı olmaq lazım idi.

– İcraiyyə Komitəsindən getməyinizlə bağlı xəbər doğrudu?
– Xahiş edirəm, mənə bu barədə sual verməyin. Hələ ki, heç bir şey yoxdu.

– Əlinizdəki heyətlə çempion olacağınıza inanırsız?
– Başqa çıxış yolumuz yoxdu. Say olaraq transfer etmək istəmirik. Futbolçunu kollektivə uyğunlaşdırmaq asan deyil. Bəzən kluba, ölkəyə uyğunlaşmaq çətin olur. “Qarabağ”da oynamaq asan deyil. Həm çempionluq, həm avrokuboklarda iştirak tələb olunur. Çox ehtiyatlanırıq. Bir neçə belə oyun keçirsək, çempionluq əldən gedə bilər. “TOP-5” ölkələrində də belə hallar olur. Arxayınlaşmamalıyıq. 90 dəqiqə ərzində 3 xal əlimizdə idi... İndiki heyəti daha yaxşı toparlaya bilərəm nəinki yeniləri.

– Avropa Liqasındakı rəqibiniz “Olimpiakos” haqda nə düşünürsüz?
- Güclü rəqibdi. Sürətiylə seçilən komandalardan biridi. Məncə, daha rahat oynayacayıq. Çünki təzyiq az olacaq. Bu mövsüm yaxşı oyunlarımız oldu, amma nəticələrimiz ürəkaçan olmadı. İndi əlimizdəki futbolçuları qoruyub-saxlamalıyıq.

KƏNAN BAHADIR