“Qarabağ” Misli premyer-liqasının 4-cü turu çərçivəsində doğma meydanda “Turan Tovuz”a məğlub oldu - 0:1.

“Football-plus.az” xəbər verir ki, “köhlən atlar”ın baş məşqçisi Qurban Qurbanov oyundan sonra keçirilən mətbuat konfransında iştirak edib və jurnalistlərin suallarını cavablayıb:

- Qolla nəticələnən penaltidən sonra hakimə kəskin etiraz etdiz. Səbəbi nə idi?
- Ofsyad epizoduna görə. Çox cüzi ofsayd var idi. Həm də bildirdim ki, hücum varsa, davam edib sonra saxlaya bilərsən. O da bildirdi ki, hücum qapıya doğru getsəydi, davam etdirərdim.

- Zaqreb “Dinamo”suyla görüşün bu oyuna təsiri var idi?
- Ümumiyyətlə, oyunların hamısının təsiri var. Təkcə həmin matç deyil. Çünki fərqli heyətlərlə oynayırıq. Hazırlığımızın dinamikası da pozulur. Məşqlərdə həmişə gileylənmişəm. Ancaq neçə illərdi ki, belə davam edirik. İlk iki oyunumuzda hiss olunmadısa, burda hiss edildi. Həm belə zamanda futbolçuların sağlığı çox önəmlidi. Məsələn, Marko Yankoviçlə Marko Veşoviçin yoxluğu belə təsirsiz ötüşmür. Zədəlilər olduqda da məşqin keyfiyyəti aşağı düşür. Amma mövsümün başlanğıcı üçün normaldı. İnşallah ki, toparlanacağıq. Həmişə bildirmişəm ki, belə məğlubiyyətlərin komandamıza xeyri daha çox olur nəinki əksi.

- Yeni qapıçının performansını necə dəyərləndirdiniz? Demək olarmı ki, bundan sonra daha çox şans alacaq?
- Normal. Hələ ki, ilk oyunu idi. Lazım olan epizodlarda düzgün qərarlar verdi. Öz əlindədi. Daha yaxşı davam etsə, yox deməyəcəyik.

KAMAL SƏFƏR