"Qarabağ" Misli premyer-liqasının 15-ci turunda "Neftçi"nin meydanında qələbə qazandı - 3:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Yaxşı oyunla vacib qələbə qazandıq. Düzü, birinci hissədə göstərdiyimiz performansdan razı qalmadım. Amma ikinci yarıda daha yaxşı oyun sərgilədik. Stadionda maraqlı ab-hava var idi. Samirə və "Neftçi"yə uğurlar arzu edirəm.

- Romao və Elvini fasilədə əvəzlədiz. Nədən narazı qaldız?
- Romao zədələndi. Ola bilər ki, durumu ciddi olsun. Elvin isə sarı vərəqə aldı.

- İlk qoldan sonra Leandro və Medinaya sarı vərəqələr verildi. Deyəsən, narazı qaldız.
- Futbolçularım dəfələrlə qoldan sonra şəkil çəkdiriblər. Bunun qayda pozuntusu olub-olmadığını bilmirəm.

- Nəriman və Musanın çıxışındən nə dərəcədə razısız?
- Nəriman bu gün qol vurdu. Təhlükəli epizodlarda özünü yaxşı tərəfdən göstərməyə çalışdı. Hər ikisi daha çox oynamalıdı. Sadəcə, bəzən oyunların təqvimi buna imkan vermir. Oyunun dinamikasını nəzərə alsaq, ikisindən də razı qaldım.

- Heyət seçimi avrokuboklara hazırlıqlarla bağlı idi?
- Oyuna ciddi hazırlaşmışdıq. Azarkeşlərimizə baxımlı oyun göstərmək istəyirdik. Hazır olan futbolçuları meydana buraxdıq.

- Qarşıda komandanı gərgin qrafik gözləyir. Futbolçular buna hazırdımı?
- Hazır olmağa məcburuq. Düzü, belə dövrlərdə oyunçuların hamısını bütün matçlara kökləyə bilmirik. İnşallah, çətin olsa da, həm fiziki, həm də psixoloji yorğunluğun öhdəsindən gələcəyik.

- Qarşıdakı oyunlarda Şahruddinə şans vermək istəyirsiz?
- Komandayla birgə 4-5 məşq keçirib. Böyük ehtimalla, qışa qədər ona bir neçə oyunda şans verəcəyik.

- Ölkə kubokunda "Qəbələ"ylə qarşılaşacaqsız. Oyun haqda fikirləriniz necədi?
- Ən təhlükəli oyunlar belə rəqiblərə qarşı olur. Oyuna tam ciddi hazırlaşacağıq. Bunu əminliklə deyirəm.

KƏNAN BAHADIR