"Qarabağ" Misli premyer-liqasının 13-cü turunda evdə "Zirə"ni böyük hesabla məğlub etdi - 4:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Vacib qələbə qazandıq. Komandada bir az yorğunluq var idi. Ağır səfərdən qayıtmışıq. Bu, ilk hissədə daha çox hiss olundu. Baxmayaraq ki, hesabı açmışdıq. Oyundan məmnun deyildim. İkinci yarıda daha fəal oynadıq. "Zirə" birinci hissədə yaxşı müdafiə olundu. Rəqibimizə uğurlar arzulayıram.

- Sanki ikinci dəqiqədə vurulan qol hesabın 4:0 olmasını asanlaşdırdı...
- Belə suallar çox verilir. Amma futbol o dərəcədə inkişaf edib ki, qol vurmaq qələbə qazanmaq deyil. Mübarizə son dəqiqələrə qədər davam edir. Futbolçularım ilk hissədə çoxlu təhlükəli vəziyyət yarada bilmədi. Rəqiblər bizə həddən artıq ciddi yaşanır. Bəzən topla istədiyin kimi davrana bilmirsən. Xeyli sayda imkan əldə etsən də, fürsətləri boşa verirsən. Qollar vura bilməyəndə də başa düşürük ki, nə vaxtsa bunu bacaracağıq. Oyun planından əl çəkmək lazım deyil. Demək olar ki, bütün oyunlarda xeyli qol imkanımız olur. Belədə inanırıq ki, növbəti matçlarda daha yaxşısını edə biləcəyik.

- "Bude/Qlimt"lə matçda meydana fərqli heyət buraxmışdız. Növbəti oyunlarda da belə dəyişiklər görə bilərikmi?
- Böyük oyunlarda heyəti dəyişməyin tərəfdarı deyiləm. Amma bəzən bir-iki dəyişiklik ola bilər. Futbolçuların hazırlıq səviyyəsi çox önəmlidi. Avrokuboklardakı rəqiblər 90 dəqiqə ərzində təzyiq yarada biləcək gücdədi. Əsas odu ki, Norveçdə vacib qələbə qazandıq. Həqiqətən həmin oyun bizim üçün çox önəmli idi.

- Çempionatın üçdəbiri geridə qalıb. İlk turda qalib gəldiyiniz "Araz-Naxçıvan" ikinci pillədə qərarlaşıb. Yalnız "Qarabağ"a uduzub. Belə mənzərə sizi təəccübləndirirmi?
- "Araz-Naxçıvan" baxımlı oyun göstərir. Hansısa komanda yuxarı pillədə qərarlaşıbsa, deməli, onun haqqıdı. Qarşıda hələ çox oyun var. Dəyişikliklər ola bilər. Rəqiblərimizə uğurlar arzulayıram. Maraqlı oyun göstərirlər. Bir-birindən çəkinmirlər. Belə mənzərəyə ancaq sevinmək olar.

KƏNAN BAHADIR