“Bəzən belə məqamlarda oyunçunu əvəzləməklə ona fayda verirsən” – Azər Bağırov
“Kəpəz” Misli premyer-liqasının 12-ci turunda evdə “Səbail”i məğlub etdi.
“Football-plus.az” xəbər verir ki, “sarı-göylər”in baş məşqçisi Azər Bağırov oyunsonrası mətbuat konfransında jurnalistlərin suallarını cavablayıb.
- Oyun istədiyimiz kimi alınmasa da, sonq qədər əzm var idi. Futbolçularım özlərini yaxşı tərəfdən göstərməyə çalışdılar. Dəyişiklik bəhrə verdi. “Turan Tovuz”la oyunda yaxşı mübarizə aparsaq da, sonda məğlub olduq. Belə oyunlarımızın daha çox olmasını istəyirik.
- Son dəqiqə qolu komandaya əlavə motivasiya verəcək?
- Ötən matçda son dəqiqələrdə qol buraxdıq, bu gün isə son dəqiqədə qol vurduq. Sona qədər qol vurmaq istəməyimiz yaxşı motivasiyadı. İkinci hissədə daha yaxşı idik. İlk yarıda küləyə qarşı oynayırdıq. Layiqli qələbə qazandıq.
- Orxan Əliyevin oyunundan narazıydız?
- İlk dəqiqələrdə çox top itirdi. Özünü narahat hiss edirdi. Bəzən belə məqamlarda oyunçunu əvəzləməklə ona fayda verirsən. Bu gün "Səbail" də bizə sürpriz etdi. Onların beşli müdafiə ilə oynayacağını gözləmirdik. Amma futbolçularım sonradan buna uyğunlaşdılar.
ƏSƏD SEYİDOV
