Müxtəlif qaynaqların yaydığı xəbərə görə, Vinisius Junior futbol klubu almağa hazırlaşır.

"Football-plus.az" xəbər verir ki, “Real”ın braziliyalı lideri Portuqaliyanın 2-ci liqasının təmsilçiləri arasında seçim edir.

Vinisius nə etmək istəyir?
Vinisiusun klub almaqda maraqlı olduğunu bir neçə qaynaq təsdiqləyir. Futbolçuya yaxın şəxsə istinad edən ESPN bildirir ki, braziliyalı Portuqaliya 2-ci liqasından klub almaq variantını nəzərdən keçirir: orda 18 komanda çıxış edir, düzdü, ikisi “Portu” ilə “Benfika”nın ikinci komandasıdı. Bu məlumatları jurnalist Roberto Antolin də İspaniyanın Cadena COPE radiosunun efirində səsləndirib. Braziliyanın UOL nəşri isə daha dəqiq informasiya açıqlayıb: Vinisius 3-cü liqada iki il keçirəndən sonra yalnız bu mövsüm 2-ci liqaya vəsiqə qazanan “Alverka”nın alınmasına 10 milyon avro yatırmağa hazırdı. Buna qədər isə maliyyələşmə ilə bağlı problem yaşayan klub təxminən 20 il peşəkar səviyyədə çıxış etməyib, Lissabon çempionatında gün keçirib. “Alverka” hazırda turnir cədvəlinin 8-ci pilləsində qərarlaşıb. Adı çəkilən qaynaq “Leyşoynş” klubunun alınmasının mümkünlüyünü də xəbər verib.
Portuqaliyanın “A Bola” nəşri də bəzi təfərrüatları açıqlayıb. Vinisiusun “Alverka”ya marağını təsdiqləyən qəzet onu da xəbər verir ki, danışqlar qarşıdakı bir neçə gün ərzində yekunlaşacaq. Məhz buna görə klub transfer bazarında hələ ki heç bir addım atmır, Vinisius investisiya qoyandan sonra eliyaya yüksəlmək niyyəti ilə “yağlı bazarlıq edəcək”.

Vininin adından danışıqları amerikalı reper Jay-Z-nin yaratdığı “Roc Nation Sports Brazil” agentliyi aparır. Danışıqlar “Alverka”nın 75 yaşlı sahibi Rikardo Visintin ilə aparılır. Klub səhmlərinin 77 faizi braziliyalı biznesmenə məxsusdu.

Vinisiusun pulu çatacaqmı?
Futbol klubunun alışı və idarə olunması ciddi kapital tələb edir. Xoşbəxtlikdən 24 yaşlı forvard yaxşı qazanır – “Capology” statistika saytının informasiyasına görə, braziliyalı “Real”da ilə 20,8 milyon avro qazanır. “Alverka”nın alınması üçün isə bu pulun təxminən yarısı tələb olunur.
Vinisiusun sponsorluq müqavilələri də çoxdu. “Forbes” jurnalına inansaq, o, ötən il 55 milyon avro qazanmaqla dünyada futbolçular arasında 7-ci yerdə qərarlaşıb. Braziliyalının “PlayStation”, “Pepsi”, “Clear”, “Nike” və bir neçə başqa şirkətlə müqaviləsi var.

Hansı futbolçular klub alıb?
Vinisiusun “Real”dakı komanda yoldaşı Kilian Mbappe yayda futbol klubunda pay sahibi olub. Məşhur hücumçu Fransanın 2-ci liqasında çıxış edən “Kan”ın səhmlərinə yiyələnməkdən ötrü 20 milyon avrodan keçib. O artıq klubun majoritar səhmdarıdı, səhmlərin 80 faizi “Real”ın ulduzuna məxsusdu. Kilian özü uşaqkən, yəni “Monako”nun akademiyasına qəbul olunana qədər “Kan”da çıxış edib.

Nqolo Kante isə bu mənada daha gözlənilməz seçim edib – 2023-cü ilin yayında Belçikanın 3-cü divizionunda yarışan “Ekselsior Virton”u alıb. Həmin sövdələşmənin maliyyə təfərrüatı açıqlanmayıb. Klub Kantenin himayəsində olduğu ilyarımda 3-cü divziondan yuxarı qalxa bilməyib.