2023-cü ilin yayında ''Fənərbaxça''ya böyük ümidlərlə transfer olunan Cengiz Ündər İstanbuldan ayrılmaq üzrədi.

15 milyon avroya heyətə cəlb edilən türkiyəli vinger həmin dönəm ''Fənər'' tarixinin ən bahalı transferinə çevrilmişdi. Bu mövsümün əvvəlində bu rekord Yussef Əl-Nəsiriyə keçdi. Ötən mövsüm İsmayıl Kartalın dönəmində az-çox oynamaq şansı qazanan və komandaya müəyyən fayda verməyi bacaran Cengiz Joze Mourinyonun gəlişindən sonra tamamilə gözdən düşdü. Belə demək mümkünsə, bayramdan bayrama oynayan Cengiz Türkiyə yığmasına da artıq dəvət olunmur. Bu üzdən 27 yaşlı futbolçu karyerasında yeni səhifə açmaq qərarına gəlib.

Türkiyə mətbuatının yazdığına inansaq, Cengiz A seriyası təmsilçisi ''Torino''ya yollanmaq üzrədi. Bu keçid icarə əsasında baş tutacaq. Turin klubu Cengizi daimi əsasda transfer etmək hüququnu da ələ keçirmək istəyir. Danışıqlar hələ tam başa çatmasa da tərəflər ilkin anlaşma əldə ediblər. Cengizin illik qazancı 3,5 milyon avrodu və bu məbləğin müəyyən hissəsini italyanlar ödəyəcək. Ündər bu mövsüm 6 rəsmi oyunda cəmi 153 dəqiqə meydanda olub və aktivinə, qol və ya məhsuldar ötürmə yazmayıb. Qeyd edək ki, ''Torino'' 2022-ci ilin yayında 4 milyon avro qarşılığında ''Beşiktaş''ın gənc vingeri Əmirhan İlkhanı da transfer etmişdi. Amma bu futbolçunun İtaliya karyerası çox da uğurlu keçmədi.

Əmirhan 2022/23-ün ikinci dövrəsini icarə əsasında ''Sampdoriya''da, ötən mövsümü isə icarə əsasında ''İstanbul BŞ''də keçirmişdi. Hazırda İlkhan hələ ''Torino''dadı.

ƏLİ