Bu yay heyətini 8 yeni futbolçu ilə gücləndirən, amma sonda Uilfrid Zaha uğrunda mübarizədə “Qalatasaray”a məğlub olan “Fənərbaxça” yenidən belə desək, qollarını çırmalayıb.

“Football-plus.az” xəbər verir ki, amma rəhbərlik heyətdəki legionerlərin bolluğunu və legioner limitinin mövcudluğunu nəzərə alaraq strategiyanı dəyişmək qərarına gəlib. Artıq “Fənər” yerli oyunçu statusunda olanlara maraq göstərməyə başlayıb. Eləcə də baş məşqçi İsmayıl Kartalın planlarına daxil olmayan legionerlərlə yavaş-yavaş yollar ayrılacaq. Hələ ki bu baxımdan üç futbolçunun adı çəkilir. Söhbət Qustavo Enrike, Dieqo Rossi və Villan Araodan gedir. Enrike ilə Rossinin adı gözlənilmədən “Zimbru” ilə oyundan öncə avroklubokların iştirak ərizəsindən çıxarılmışdı. Onların yerinə ərizəyə Samet Akaydın ilə Coşua Kinq daxil edilmişdi. Türkiyə mətbuatının yazdığına inansaq, hər iki futbolçuya özlərinə yeni klub tapmaq tövsiyə olunub. Araoda durum bir qədər fərqlidi. Onun adı hələ də iştirak ərizəsindədi. Düzdü, 31 yaşlı futbolçu “Zimbru” ilə oyunda iştirak etmədi. Araonun ayrılması barədə söz-söhbət onun sosial şəbəkədəki addımımdan sonra yayıldı. Belə ki, bu futbolçu sosial şəbəkədə “Fənər”in rəsmi səhifələrini təqibdən çıxarıb! Braziliyalı dayaq yarımmüdafiəçi komandaya ötən yay Jorje Jezuşun istəyi ilə 3 milyon avroya “Flamenqo”dan cəlb olunmuşdu. O ötən mövsüm 45 rəsmi oyunda 1 qol, 2 məhsuldar ötürməlik performans sərgiləmişdi. Çox güman, qarşıdakı günlərdə “sambaçı”nın taleyinə aydınıq gələcək.
İstanbul nəhənginin transfer etmək istədiyi yerli oyunçulara gəlincə, bunların başında “Marsel”in vingeri Cengiz Ündər gəlir. Son günlər bu transfer ətrafında Türkiyə mətbuatında xeyli söz-söhbət gəzir. Deyilənə görə, “Fənər” rəhbərliyi artıq bu transferdə bir xeyli irəliləyib. Hətta Cengizin Türkiyəyə gəlməsi üçün Edin Ceko da işin içinə daxil edilib. Çünki bosniyalı ulduzla türkiyəli ulduz yaxın keçmişdə bir neçə il “Roma”da birlikdə top qovub. “Marsel” danışıqlara 15 milyon avrodan start versə də, sonradan bir qədər “aşağı endi”. “Fənər”in 4 milyon (və ya 5 milyon) avrosu bonuslarla olmaqla bu keçidi 12 milyon avroya tamamlayacağı gözlənilir. Cengizlə “Fənər” arasında artıq dördillik razılıq əldə olunub. Qalır yalnız klubların anlaşması. Hərçənd bəzi mənbələr iddia edir ki, “Marsel” futbolçusuna görə 20 milyon avro istəyir. 26 yaşlı futbolçu ötən mövsüm Fransa klubunun heyətində 46 rəsmi oyunda 5 qol, 6 məhsuldar ötürməlik performans sərgiləyib. Türkiyə yığmasında isə Cengiz indiyə qədər 49 oyuna 16 qol vurub. “Sarı-lacivərdlilər”in hədəfində olan digər yerli oyunçular “Roma”da top qovan Zəki Çəlik və Dortmund “Borussiya”sının şərəfini qoruyan Salih Özcandı. Cengiz kimi Zəki ilə Salih də Türkiyə yığmasının üzvüdü. Amma hələ ki bu iki oyunçu ilə danışıqlar prosesinin hansı mərhələdə olması barədə məlumat yoxdu. “Maliyyə feyr-pleyi” ilə bağlı sıxıntıları olan və yeni transferlərə lisenziya ala bilmək üçün bir neçə futbolçu ilə vidalaşmaq istəyən “Roma”nın Zəkinin gedişinə icazə verəcəyi istisna olunmur.