İstanbul nəhəngləri ''Fənərbaxça'' ilə ''Qalatasaray'' həm bir-biri ilə rəqabət aparmaqda, həm də inanılmaz transfer dönəmi keçirməkdədi.

"Football-plus.az" xəbər verir ki, bilindiyi kimi, Türkiyə futbolu tarixinin ən bahalı heyətini quran ''Cim-Bom'' Uilfrid Zahanı əzəli rəqibinin əlindən almış və ''Fənər''ə acıq vermişdi. Bundan başqa, ''Şaxtyor''dan ayrılan Tete də son anda ''Fənər''i yox, ''Qalatasaray''ı seçmişdi. ''Sarı-lacivərdlilər''in cavabı gecikmədi. Uzun müddətdi ''Qalatasaray''la danışıqlar aparan ''Mançester Yunayted''in braziliyalı dayaq yarımmüdafiəçi Fred artıq rəsmən ''Fənər''in oyunçusudu! Klubdan verilən məlumatda qeyd olunub ki, bu transfer İstanbul nəhənginə 9743589 avroya başa gəlib. Bu məbləğ ingilislərə 4 il ərzində 8 hissəyə bölünərək ödəniləcək. ''Qalatasaray''ın rəsmi səhifələri Zaha transferi zamanı ''Zahahaha'' paylaşımı edərək ''Fənər''ə acıq vermişdi. ''Fənər'' isə məşhur cizgi filmi qəhrəmanı Fred Çakmaktaşın şəklini paylaşaraq altından ''istəyənlər üçün bir Fred daha var'' ifadəsini yazdı. Qeyd edək ki, karyerasını ''İnternasyonal''da başlayan və ulduzu ''Şaxtyor''da parlayan 30 yaşlı dayaq yarımmüdafiəçisi 2018-dən ''Yunayted''in şərəfini qoruyurdu. Premyer-liqada o, 139 oyunda 8 qol, 7 məhsuldar ötürməlik performans sərgiləmişdi.

Amma ''Fənərbaxça'' Fredlə kifayətlənməyərək daha bir ''bomba''nı partlatdı. Belə ki, komanda uzun müddətdi danışıqlar apardığı Türkiyə yığmasının ulduzu Cengiz Ündəri də heyətinə qatıb. Cengizin ''Marsel''lə 2025-ci ilə qədər müqaviləsi var idi. Fransızlar 20 milyon avro tələb edirdilər. Əvvəlcə 10, sonra 12 milyon avro təklif edən ''Fənər'' sonda bu transferi 15 milyon avroya yekunlaşdırdı. Bu məbləğ qarşı tərəfə 4 hissəyə bölünərək ödəniləcək. Bununla da Ündər klub tarixinin ən bahalı transferinə çevrildi! Əvvəlki rekord 2008-də 14 milyon avroya transfer edilən ispaniyalı forvard Daniel Quizaya məxsus idi. Cengiz yeni klubunda ''20'' nömrəli formanı geyəcək. ''Altınordu''nun yetirməsi olan Cengiz 2016/17-ni ''İstanbul BŞ''də keçirdikdən sonra Avropaya yollanmışdı. ''Roma'' və ''Lester'' macəralarının ardından 2022-nin yanvarından ''Marsel''in şərəfini qoruyurdu. Fransa nəhəngində 93 rəsmi oyunda 18 qol, 12 məhsuldar ötürməlik performans sərgiləyən Ündər Türkiyə yığmasında isə 49 oyuna 16 qol vurub.

Onu da bildirək ki, ''Fənərbaxça'' bu yay transferlərə 49,65 milyon avro xərcləməklə tarixinin yeni rekorduna imza atıb. Özü də nəzərə alaq ki, Tadiç, Ceko, Kent və Ciku kimi transferlər kluba pulsuz başa gəlib. ''Fənər'' eyni zamanda bu yay oyunçu satışından da 47,9 milyon avro gəlir əldə edərək Türkiyədə hər kəsi üstələyib.

''Qalatasaray''a gəlincə, komanda ən son gənc türkiyəli yarımmüdafiəçi Sıraçhan Nası transfer edib. Son mövsümü 3-cü divizion təmsilçisi ''Osmanlıspor''da keçirən və bu klubun yetirməsi olan 21 yaşlı futbolçu ''Qalatasaray''la beşillik müqavilə imzalayıb. Bu transfer ''sarı-qırmızılar''a 10 milyon lirəyə başa gəlib. Bu futbolçunun başqa kluba icarəyə veriləcəyi gözlənilir.