Kriştiano Ronaldonun şərəfini qoruduğu ''Əl-Nəsr''in ''Fənərbaxça''nın forvardı Yussef Ən-Nəsiriyə marağı davam edir. Əslində İstanbul nəhəngi Joze Mourinyonun istəyi ilə transfer edilən merakeşli ilə vidalaşmaq istəmir.

Çünki Mourinyo hələ də ona güvənir. Üstəlik qış fasiləsində bu cür səviyyədə hücumçu tapmaq çətin olacaq. Amma ərəblər 34 milyon avroluq Türkiyə futbolu üçün astronomik sayılan bir məbləğ təklif ediblər. Maraqlıdı ki, ''Fənər'' bu təklifi də geri çevirib. Amma rəhbərliyin mövqeyi bir qədər dəyişib. Türkiyə mətbuatının yazdığına inansaq, ''Fənər'' ''Əl-Nəsr''ə Ən-Nəsirini 38 milyon avroya satmağa hazır olduğunu bildirib. Bundan başqa ''sarı-lacivərdlilər'' növbəti satışdan 15 faiz pay tələb ediblər.

Transfer bu məbləğə baş tutsa, ''Fənər'' 3 ay ərzində ikinci dəfə minimum 30 milyon avroluq satış həyata keçirəcək. Çünki avqustun sonlarında Fərdi Kadıoğlu 30 milyon avroya ''Brayton''a yollanmışdı. Həm də komanda Ən-Nəsiridən ciddi gəlir əldə etmiş olacaq. Çünki bu futbolçu iyulun sonlarında 19,5 milyon avroya transfer edilmiş və Türkiyə futbolunun ən bahalı transferinə çevrilmişdi.

ƏLİ