Türkiyə yığmasının üzvü Cengiz Ündərlə bağlı maraqlı xəbər yayılıb.

Karyerasını ''Marsel''də davam etdirən 25 yaşlı vinger barədə son dönəmlərdə transfer şaiyələri yayılmışdı. ''Marsel''in yeni baş məşqçisi İqor Tudorla ulduzu barışmayan futbolçu ''Qalatasaray'' və ''Atalanta''nın maraq dairəsinə düşmüşdü. Xüsusilə də ''Cim-Bom''un baş məşqçisi Okan Buruk onun xidmətində çox maraqlı idi. Amma Cengizin həm vətənindən, həm də İtaliyadan gələn təklifi geri çevirdiyi məlum olub. Özü də qeyri-adi bir səbəb üzündən. Fransa saytlarından birinin yazdığına inansaq, türkiyəli oyunçu bu ölkədə futbol oynamaqla yanaşı öz biznesini də qurmağı planlaşdırır. Sən demə Cengiz Fransada kabab restoranları şəbəkəsi açmaq niyyətindədi. Hətta o, bunun üçün Ankaradan xüsusi sənəd də alıb. Xəbəri paylaşan sayt həmin sənədin şəklini də oxucularına təqdim edib. Bu mövsüm Ündər Liqa-1-də 3 qarşılaşmada 126 dəqiqə meydanda olub və məhsuldar hərəkətlə fərqlənməyib.