Müdafiə xəttini gücləndirmək istəyən ''Fənərbaxça'' ilə bağlı yeni transfer xəbəri var.

''Football-plus.az'' xəbər verir ki, Türkiyə mətbuatının iddiasına görə İstanbul nəhəngi Frankfurt ''Ayntraxt''ının üzvü Tutanı heyətinə qatmaq üzrədi. Klublar arasında artıq anlaşma əldə olunduğu deyilir. Hazırda şəxsi detalları razılaşdırmaq üçün futbolçunun meneceri ilə danışıqlar davam etdirilir. Amma keçidin ''Fənər''ə neçəyə başa gələcəyi barədə məlumat verilmir.

Tam adı Lukas Melo Silva olan braziliyalı mərkəz müdafiəçisinin transfer dəyəri 15 milyon avrodu. Fiziki göstəriciləri ilə seçilən Tuta müdafiənin sağ cinahında da oynamağı bacarır. ''Ayntraxt'' 25 yaşlı futbolçunu hələ 2018-ci ildə ''San Paulu''dan 1,8 milyon avroya transfer edib. O vaxt bu futbolçu ''San Paulu''nun U-20 komandasında çıxış edirdi.

2019/20-ni icarə əsasında ''Kortreyk''də keçirən Tuta 2020-dən bu yana ''Ayntraxt''ın əsas heyət üzvü sayılır. Bu mövsüm 22 rəsmi oyunda forma geyən və 1 qol vuran ''sambaçı'' ümumilikdə Frankfurt təmsilçisində 165 rəsmi oyun keçirərək 9 qol, 3 məhsuldar ötürmə ilə fərqlənib.

ƏLİ