Mövsümə mükəmməl başlayan və 9 rəsmi oyunun hamısında qalib gələn “Fənərbaxça” təkcə Türkiyədə yox, Avropada da iddialı heyət qurub.

"Football-plus.az" xəbər verir ki, İstanbul nəhəngi bu yay ümumi dəyəri 150 milyon avroya yaxın olan 12 futbolçunu heyətinə qatıb.

Yeni transferlərin ardından “sarı-lacivərdlilər”in heyətinin dəyəri 209,1 milyon avroya çatıb! Bilindiyi kimi, “Fənər” Konfrans Liqasında mübarizəni davam etdirir və “Ludoqorets”, “Norşellan”, Trnava “Spartak”ı ilə eyni qrupda çıxış edəcək. Məlum olub ki, İstanbul nəhəngi heyətinin dəyərinə görə bu mövsüm KL-də iştirak edən edən 32 klub arasında 3-cü pillədədi!

“Fənərbaxça” bu göstəricidə yalnız 607,7 milyon avroluq “Aston Villa”dan və 248,6 milyon avroluq “Fiorentina”dan geri qalır. Bu fakta əsasən “Fənər”in KL-in favoritlərindən biri olduğunu söyləmək mümkündü. Qrupdakı rəqiblərdən “Ludoqorets”in heyətinin dəyəri 37,2 milyon avro, “Norşellan”da 36,7 milyon avro, “Spartak”da isə 26,3 milyon avrodu. KL-də mübarizə aparan İstanbulun digər nəhəngi “Beşiktaş”ın heyətirinin dəyəri 129,2 milyon avrodu. Komanda bu göstəricidə 6-cı pillədədi. “Beşiktaş” yuxarıda adını çəkdiyimiz üç komanda ilə yanaşı, “Lill” (207,8 milyon avro) və Frankfurt “Ayntraxt”ından (170) da geridədi. Xatırladaq ki, bu yay önəmli transferlər həyata keçirən İstanbulun digər nəhəngi “Qalatasaray”ın heyətinin dəyəri isə 251,9 milyon avrodu. Bu, Türkiyə futbolunda rekord göstəricidi.

“Fənərbaxça” və “Beşiktaş”dan fərqli “Qalatasaray” bu mövsüm Çempionlar Liqasının qrupunda oynayacaq. “Cim-Bom” “Bavariya”, “Mançester Yunayted” və “Kopenhagen”lə eyni qrupa düşüb.