Müdafiə xəttini mütləq gücləndirmək istəyən ''Fənərbaxça''nın ''Ayntraxt''lı Tuta ilə anlaşmaq üzrə olduğunu xəbər vermişdik. Amma belə görünür, bu keçidin üstündən artıq xətt çəkilib.

''Football-plus.az'' xəbər verir ki, braziliyalı futbolçu son anda qərarını dəyişərək Frankfurt klubunda karyerasını davam etdirmək istəyib. Bu üzdən İstanbul nəhəngi dərhal diqqətini başqa futbolçuya yönəldib. Söhbət ''Aston Villa''nın mərkəz müdafiəçisi Dieqo Karlosdan gedir.

Türkiyə mətbuatının yazdığına inansaq, ''Fənər'' rəsmiləri qısa müddət ərzində həm ''Aston Villa'', həm də braziliyalı futbolçunun özü ilə anlaşmağa müvəffəq olublar. İddialara görə bu transfer ''sarı-lacivərdlilər''ə 10 milyon funt sterlinqə, yəni təxminən 12 milyon avroya başa gələcək. Karlos bu gün premyer-liqada ''Arsenal''a qarşı baş tutacaq oyunu buraxacaq. Baş məşqçi Unay Emeri bunun zədə ilə bağlı olduğunu desə də, əsas səbəb Karlosun İstanbula yollanmaq üzrə olmasıdı. Keçid qeyd olunan məbləğə baş tutsa, Dieqo Karlos ''Fənərbaxça'' tarixinin ən bahalı müdafiəçisinə çevriləcək.

Hazırda bu göstəricidə rekord 8,5 milyon avroya transfer olunan Çağlar Söyüncüyə məxsusdu, Bekao 8,3 milyon avroya, Kyaer 7,65 milyon avroya, Luqano 7,5 milyon avroya transfer olunmuşdu. Maraqlıdı ki, iddialara inansaq, son anda ''Qalatasaray'' da bu futbolçunu transfer etməyə cəhd göstərdi. Amma ilk görüşdə ''Fənər''ə keçməyə razılıq verən ''sambaçı'' sözündən dönmək istəmədi. 31 yaşlı Dieqo Karlos daha öncə ''San Paulu'', ''Portu'', ''Eştoril'', ''Nant'', ''Sevilya''nın şərəfini qoruyub. Ulduzu İspaniyada parlayan bu futbolçu 2022-nin yayında 31 milyon avroya ''Aston Villa''ya transfer olunub.

Çempionlar Liqası təcrübəsi də olan Karlos sürəti və cəldliyi ilə diqqət çəkir. Bu mövsüm o, ''Aston Villa''da 17 rəsmi oyunda iştirak edərək ümumilikdə 1403 dəqiqə meydanda olub.

ƏLİ