Transferlərdən doymayan və ən son serbiyalı ulduz Duşan Tadiçi heyətinə qatmaqla fanatlarını məst edən “Fənərbaxça” daha bir keçidi açıqlamaq üzrədi.

"Football-plus.az" xəbər verir ki, İstanbul nəhəngi dünən “Udineze”li Rodriqo Bekao ilə danışıqlara başladığını rəsmən açıqladı.

Danışıqların son mərhələsini müzakirə etmək və tibbi mayinədən keçmək üçün İstanbula dəvət olunan braziliyalı futbolçu ilə bu gün rəsmi müqavilə imzalanacağı gözlənilir. Keçidin detallarına gəlincə, Türkiyə mətbuatının iddiasına görə, “Fənər” İtaliya klubuna ya 8, ya da 9 milyon avro ödəyəcək. Bekao ilə dördillik müqavilə imzalanacaq. Onun illik qazancı 1,8 milyon avro təşkil edəcək. Tam adı Rodriqo Nasimento Fransa olan və daha çox Bekao kimi tanınan bu futbolçu 1997-ci il təvəllüdlü braziliyalı mərkəz müdafiəçisidi.

O, Braziliya təmsilçisi “Bayya”nın yetirməsidi və peşəkar karyerasına da bu klubda başlayıb. Daha sonra 2018-də ilk dəfə Avropaya yollanaraq icarə əsasında bir mövsüm Rusiya təmsilçisi ÇSKA-nın şərəfini qoruyub. 2019-da “Udineze” onu 1,6 milyon avroya transfer etmişdi və o vaxtdan Bekao udinelilərin şərəfini qoruyurdu. Bekao texnikalı və məhsuldar müdafiəçi sayılmır. Məsələn, o, müdafiədən hücuma topla çıxmaqda, arxadan oyun qurmaqda o qədər də güclü deyil. Bekao bir qədər köhnə tərzli müdafiəçilərdəndi və daha çox sərt, aqressiv oyuna üstünlük verir. Təsadüfi deyil ki, “Fənər”lilər indidən ona “yeni Luqano” gözü ilə baxırlar. 191 sm boya malik olan futbolçu ötən mövsüm “Udineze”nin heyətində 28 rəsmi oyunda 2 qol, 1 məhsuldar ötürmə ilə fərqləndi.

İndiyə qədər heç bir yaş qrupunda Braziliya yığmasına dəvət almayan Bekao peşəkar karyerası ərzində 177 rəsmi oyuna çıxıb və 6 qol, 3 məhsuldar ötürmə ilə yadda qalıb. Ötən mövsüm Bekao A seriyasında cərimə meydançası daxilindəki zərbələrin qarşısını ən çox kəsən müdafiəçi olmuşdu. Eləcə də onun 112 ikili mübarizədən qalib ayrıldığını bildirək. Bekao bu yay Aleksander Cikudan sonra “Fənər”in transfer etdiyi 2-ci mərkəz müdafiəçisidi. Bu isə Atilla Salainin ayrılacağı ilə bağlı şayiələri bir qədər də gücləndirir. Əslində onun Berlin təmsilçisi “Union”a keçməyə yaxın olduğu iddia edilirdi. Amma belə görünür, tərəflər arasında razılıq əldə olunmayıb. Ən son xəbərlərdə Salainin menecerinin “Hoffenhaym”la danışıqlar apardığı deyilir.