Biri var idi, biri yox... Nağıllar belə başlayır, bəzən gerçəklər də belə olur. Qazanmaq istəyirsənsə, itirməyi də gözə almalısan. Juninyodan danışacam.

Cümə axşamı - “Kəpəz”lə yoxlama oyununda canlı gördüyüm Juninyodan. Tanıyanlar bilər, oyun “Azərsun Arena”nın ehtiyat meydançasında keçirildi. Əsas qazonda isə oynamayanlar məşq edirdi. Düz bazanın qarşısında, stadionun bağlı torunun çöl tərəfindən oyunu izləyən iki nəfərdən biri Juninyo idi. Yanından keçəndə özü hörmətli şəkildə “salam” verməyi də unutmadı. Matçın gedişində braziliyalı var-gəl edirdi. Özü də necə deyərlər, kefi kök, damağı saz şəkildə. Juninyo tək-tük legionerlərdəndi ki, mediaya diqqətcil, insani baxımdan yanaşır, bir dəfə də salamsız-kalamsız keçməz. Bu dəfə Juninyoda pozitivliyin dərəcəsi daha artıq idi, ətrafa şəfəq saçırdı.

Bu Juninyo fərqli idi... “Sevilya” variantı ortaya çıxandan sonra “Şamaxı” ilə oyunda (dekabrın 19-da) futbolçunun ehtiyat skamyasında fikirli olduğunu xatırlayıram. Məhz həmin matçdan sonra Qurban Qurbanov mətbuat konfransında “mənə yaxınlaşıb bildirdi ki, bu cür klubdan təklif aldığım üçün gecələr yata bilmirəm” demişdi. Dekabrın 22-də keçirilən “Araz-Naxçıvan”la görüşdə də Juninyonu narahatlığı üzündə ifadə olundu. Sonra “Sevilya” söhbətləri daha da intensivləşdi, araya “Flamenqo” girdi... Bu dəfə özünə görə doğru qərarı vermiş, artıq qəlbi rahat olan Juninyo gördüm.

Niyə “Flamenqo”? Tarixi 1895-ci ilə söykənən, Braziliyanın ən böyük klublarından biridi. Flamenqo çimərliyində bir qrup avarçəkən tərəfindən yaradıldığına görə o vaxtdan belə adlanır. 50 milyona yaxın azarkeşlə Braziliyanın ən populyar komandasıdı. Bəs “Flamenqo” doğru qərardımı? Təbii, Braziliya və İspaniya çempionatlarını, “Flamenqo” ilə “Sevilya”nı müqayisə etmək olmaz. Juninyo kimi oyunçunun Azərbaycan çempionatından gedəcəyi reallığı hər nə qədər üzücü olsa da, İspaniya adını eşidəndə təsəlli tapırdıq. İndi “Flamenqo”nun təklifi hər şeyin üstündən xətt çəkibsə, buna da nəsə deyə bilmərik.

Qurban Qurbanova “Kəpəz”lə oyundan sonra “futbolçunuzun “Sevilya”nın təklifindən imtina etdiyi iddia olunur, bəs “Sevilya”ya, yoxsa Braziliyaya keçməsi sizin üçün daha önəmlidi” sualını verdim. Baş məşqçi cavabında “ilk növbədə futbolçunun istəyi çox önəmlidi. Ümumilikdə bizim üçün “Sevilya” daha maraqlı olardı. Çünki Avropadı, bizə daha yaxındı. Amma “Flamenqo”dan da Ronaldinyo kimi futbolçu çıxıb. Bizim üçün o qədər də fərqi yoxdu, əsas oyunçunun ürəyincə olsun, o klubdakı perspektivi daha yaxşı olsun” dedi.
Çox güman, Juninyo artıq son qərarını verib. Juninyo kimi futbolçular Azərbaycana gəlib, yenə də gələcək. Amma onun vətənində “Qarabağ”dakı qədər parlayıb-parlamayacağı cavabsız sualdı. Bəlkə də gedəcəyinə görədi, bəlkə də arzusuna çatdığına görə - Juninyo Azərbaycana, azərbaycanlılara minnətdarlığıını son günlər açıq-aşkar bildirir. Paylaşdığı videolardan da vida qoxusu gəlir.

Gedəcək, amma hara gedəcəyini bilmirik. Dəyişməz gerçək budu ki, hər aşiqin öz dövranı olur. Juninyo üçün “Qarabağ” dövranı bitib.

RÖYANƏ OĞUZ