“Qarabağ”ın braziliyalı hücumçusu Juninyo ətrafında həyəcan artmaqdadı.

İş ondadı ki, demək olar, hər şeyin razılaşdırıldığı məqamda Braziliyanın məşhur klublarından “Flamenqo” da dövrəyə girib.

“Football-plus.az” xəbər verir ki, bu klub həm “Qarabağ”ın transferə görə tələb etdiyi 5 milyon avronu verməyə hazırdı, həm də futbolçuya “Sevilya” ilə müqayisədə hədsiz yüksək əməkhaqqı təklif edir. “Flamenqo”nun dövrəyə girməsinə isə əsas ulduzu Qabiqolun “Kruzeyro”ya keçidi səbəb olub.

Bəs “Sevilya” bu durumda nə edəcək? Axı İspaniya klubu uzun müddətdi Juninyo ilə müqavilənin şərtlərini razılaşdırıb, indi yalnız braziliyalının “Qarabağ”dan halallıq almasını (oxu: transfer məbləğinin aşağı salınmasını) gözləyir.

Elə bu gün Juninyo ilə “Qarabağ” arasında danışıqlarda son nöqtənin qoyulması mümkündü.

ORXAN