Məhşur türkiyəli şoumen Acun Ilıcalının sahibi olduğu İngiltərə təmsilçisi ''Hall Siti'' də böyük bir faciə ilə üzləşən Türkiyəyə dəstək verib.

Football-plus.az xəbər verir ki, dünən çempionşipin 31-ci turunda ''Hall Siti'' səfərdə ''Stok Siti'' ilə qarşılaşıb. Oyundan öncə zəlzələdə dünyasını dəyişənlərin xatirəsi bir dəqiqəlik sükutla yad edilib və ''Hall Siti''nin üzvləri Türkiyə bayrağı açıblar. Qarşılaşma qolsuz başa çatıb. ''Pələnglər''in məğlubiyyətsiz seriyası 3 oyuna çatıb. 31 oyuna topladığı 41 xalla 11-ci pillədə qərarlaşan ''Hall Siti'' həm də son 3 turda qol buraxmayıb. Bu arada premyer-liqa rəhbərliyi də Türkiyəyə yardım əlini uzadıb. Bu qurumdan verilən rəsmi açıqlamada Türkiyə və Suriyada zəlzələdən əziyyət çəkənlər üçün yaradılmış yardım fondlarından birinə 1 milyon funt sterlinq köçürüldüyü qeyd olunub. Niderlandın belə desək, ən türkləşmiş klubu ''Fortuna'' da yardım baxımından fəallığı ilə seçilir. Prezidenti türk olan, eləcə də heyətində 5 türkiyəli futbolçu çıxış edən Sittard təmsilçisi dünən səfərdə ''Emmen''i minimal hesabla yendi. Görüşdə yeganə qolun müəllifi olan Oğuzhan Özyakup qoldan sonra üzərində ''Pray for Turkey'' (Türkiyə üçün yardım et) yazılmış formanı kameralara göstərməklə diqqət çəkdi. ''Fortuna'' həm də oyuna üzərində ''Giro555'' SMS vasitəsilə yardım fondunun emblemi qeyd olunmuş formayla çıxmışdı. Bundan başqa bu qarşılaşmada geyilən bütün formalar yardım məqsədi ilə satışa çıxarılıb. Onu da bildirək ki, dünən bundesliqada baş tutan ''Bavariya'' – ''Bohum'' oyunundan öncə də Türkiyə və Suriyada zəlzələ qurbanlarının xatirəsi 1 dəqiqəlik sükutla yad edildi.