“AFFA məsələnin baxılmamış saxlanılmasını məhkəmədən tələb edirdi” - Mirhüseyn Seyidovla AFFA arasında nələr baş verir?
2017-ci ildə danışılmış oyunlarda iştiraka görə futbolla məşğul olmasına qadağa qoyulan Mirhüseyn Seyidov AFFA-dan Xətai Rayon Məhkəməsinə şikayət edib.
Daha doğrusu, onun vəkili Elcan Həsənli bir müddət öncə qurumdan yenidən araşdırma aparılmasını tələb edib.
Dekabrın 19-da futbolçu ilə AFFA arasında keçirilməli olan məhkəmənin ilkin iclasə təxirə salınıb. AFFA-nın hüquqşünasları Mirhüseynin futboldan ömürlük uzaqlaşdırılmasının qanun çərçivəsində həyata keçirildiyini deyib. Yəni zərərçəkənin məsələ ilə bağlı şikayətini yerli və beynəlxalq futbol qurumlarına bildirməli olduğunu söyləyiblər. İddiaçı tərəf isə müraciətə baxılmasını qanunauyğun sayıb. Belədə məhkəmə yanvarın 14-nə ertələnib.
Başverənlərlə bağlı Mirhüseyn Seyidovun vəkili Elcan Həsənlinin mövqeyini öyrəndik:
“Məhkəmənin ilk hazırlıq iclası idi. Bilirsiz ki, məhkəmə bir neçə iclasdan ibarət olur. Bir proseslə hər şey yekunlaşmır. Çünki araşdırma davam edir. Ayın 19-da ilk iclas oldu, proses yanvarın 14-nə təxirə salındı. AFFA tərəfi şifahi vəsatət vermişdi ki, mübahisəyə məhkəmədə baxılmasın. Amma yazılı təqdim etməmişdilər. Ona görə də təxirə salındı. Məsələnin müzakirəsi yanvarın 14-də olacaq ki, məhkəmə bu məsələyə baxsın, ya baxmasın. Çünki AFFA məsələnin baxılmamış saxlanılmasını məhkəmədən tələb edir. Bizim mövqeyimiz isə işin məhkəmədə baxılması, ədalətli qərar verilməsidi. Hadisələri izləyirik. Ümid edirəm ki, yanvarın 14-də məhkəmə davam etdiriləcək”.
RÖYANƏ OĞUZ
Digər xəbərlər
