"Neftçi"nin yetirməsi AFFA ilə məhkəmədə çəkişəcək - vəkili detalları açıqladı
Keçmiş futbolçu Mirhüseyn Seyidov AFFA-nı məhkəməyə verib.
Niyə? "Football-plus.az" buna aydınlıq gətirmək məqsədi ilə kiçik araşdırma apardı. Məlum oldu ki, veteran oyunçunun vəkili Azərbaycan Vəkillər Kollegiyasının üzvü və idman sahəsində vəkil kimi fəaliyyət göstərən Elcan Həsənlidi.
Mövzu haqda detallı məlumat almaq məqsədilə tanınmış hüquqşünasla əlaqə saxladıq. Onun söylədikləri:
"Hazırda ətraflı bilgi vermək doğru olmaz. Onu deyə bilərəm ki, Mirhüseyn Seyidov AFFA İntizam Komitəsinin qərarıyla ömürlük futboldan uzaqlaşdırılmasından narazıdı. Məhkəmə prosesi çərçivəsində ilkin hazırlıq iclası dekabrın 19-da keçiriləcək. Yalnız bundan sonra bəzi məsələlərə aydınlıq gələcək".
Fürsətdən istifadə edib Elcan bəydən sentyabrın 17-də "Bülis"lə müqavilə bağlayan, ayyarım sonra Albaniya klubundan ayrılaraq vətənə qayıdan Amil Yunanov haqda da danışdıq. O, həmin mövzuyla bağlı görülən işlərin də davam etdiyini dedi.
Bəs Mirhüseyn Seyidov futboldan niyə ömürlük uzaqlaşdırılıb?
2017-ci il, dekabrın 1-də AFFA İntizam Komitəsinin xüsusi iclası keçirildi və burda aşağıdakı qərar qəbul edildi ki, hadisə ölkə futbolunda ciddi əks-səda doğurdu:
"Keşlə"nin (indiki "Şamaxı") AFFA-ya rəsmi müraciətinə, hüquq-mühafizə orqanları tərəfindən təqdim edilmiş məktuba və UEFA-dan daxil olmuş məlumatlara əsasən, iştirakçısı olduğu oyunun idman nəticəsinin manipulyasiyasına görə "Keşlə"nin futbolçuları - Nizami Hacıyevə və Mirhüseyn Seyidova futbola aid hər bir məşğuliyyət ömürlük qadağan edilsin".
Göründüyü kimi, söhbət danışılmış oyunlardan gedir. İndi futbolçu AFFA-dan ona dəymiş maddi ziyanın ödənilməsini tələb edir. İşə Bakı Şəhər Xətai Rayon Məhkəməsində baxılacaq.
Onu da xatırladaq ki, Mirhüseyn Seyidov "Neftçi"nin yetirməsidi. O, 2015-ci ilə qədər "ağ-qaralar"ın, ardınca cəzalanana qədər "İnter"in (klub sonradan "Keşlə" adlandırılıb - red.) formasını geyib. O, 2011/12 və 2012/13 mövsümlərində "Neftçi"nin heyətində ölkə çempionu olub. Sabiq futbolçu U-19 və U-21 millilərimizin şərəfini qorusa da, əsas yığmamızda debüt etməyib.
KƏNAN BAHADIR
Digər xəbərlər
