Bir müddət öncə Mirabdulla Abbasovun “Neftçi”dən Apellyasiya Arbitraj Tribunalına şikayət etdiyini diqqətinizə çatdırmışdıq. Bununla bağlı rəsmi məlumatı fevralın sonlarında AFFA-nın rəsmi saytı yaymışdı.

Həmin informasiyanı yenidən xatırlayaq: "İddiaçı Abbasov Mirabdulla Miryavər oğlunun nümayəndəsi Həsənli Elcan Elman oğlu tərəfindən verilən apellyasiya şikayəti təmin edilməsin. Oyunçuların Statusu və Transferi Komitəsi tərəfindən qəbul edilən 09 yanvar 2023-cü il tarixli qərar dəyişdirilmədən qüvvədə saxlanılsın".

Həmin vaxt məlumatın dəqiq olmadığını düşünərək araşdırma aparmışdıq. Sonradan bəlli olmuşdu ki, Mirabdulla Abbasov “Neftçi”dən şikayətçi olub. Hücumçu flaqmanın ona ödəməli olduğu pulun tam verilmədiyini iddia edib. Lakin Apellyasiya Arbitraj Tribunalı şikayətin əsassız olduğunu düşünərək məsələni qapatmışdı. Bundan sonra hücumçu və vəkili Elcan Həsənov İdman Arbitraj Məhkəməsinə müraciət etmək niyyətində idi. Lakin AFFA-nın tərkibindəki Apellyasiya Arbitraj Tribunalında köklü dəyişiklik olduğu üçün adı çəkilən şəxslər yenidən həmin quruma şikayət edib. Yeni heyət isə Mirabdullanı haqlı çıxarıb. Beləliklə, flaqman hücumçuya 80 min manat ödəniş edib.

Məsələ ilə bağlı hər iki tərəfin mövqeyini diqqətinizə çatdırmağa çalışacağıq.

İLKİN SULTANLI