Hazırda karyerasını ''Şturm''da davam etdirən Ərəncan Yardımcı ilə bağlı xəbər var.

"Football-plus.az" xatırladır ki, ''Qalatasaray''ın yetirməsi olan, daha sonra ''Eyüpspor''a transfer olunan və ötən mövsüm icarə əsasında çıxış etdiyi ''Pendikspor''da öz oyunu ilə diqqət çəkən gənc forvard bu ilin yayında 4 milyon avroya ''Hoffenhaym''a transfer olunmuşdu. Bundesliqa təmsilçisi daha sonra təcrübə toplaması üçün Ərəncanı ''Şturm''a icarəyə verdi.

Almaniya mətbuatının iddiasına görə ''Hoffenhaym'' rəhbərliyi 22 yaşlı futbolçununun inkişafından məmnundu. Almanlar onu artıq bu qış transfer dönəmində geri çağırmaq istəyir. 188 sm boya malik olan Yardımcı bu mövsüm 5-i Çempionlar Liqasında olmaqla ''Şturm''un heyətində 14 rəsmi oyunda forma geyərək 3 qol, 2 məhsuldar ötürmə ilə fərqlənib.

''Hoffenhaym'' mövsümü zəif keçirir. 15 oyuna yalnız 14 xal toplayan və bundesliqada 15-ci pillədə qərarlaşan ''kəndçilər''in qışda güclənməyə ehtiyacı var.

ƏLİ