Bu yay transfer bazarında fəallığı ilə seçilən ''Trabzonspor'' ən böyük prinsipial rəqibi olan ''Fənərbaxça''nın sabiq oyunçularına maraq göstərməkdə davam edir.

Bir müddət öncə ''Hall Siti''dən sabiq ''Fənər''li Ozan Tufanı heyətinə qatan Trabzon təmsilçisi indi də Attila Salai ilə anlaşmağa çox yaxındı. Rəhbərlik bu transferi ən qısa müddətdə tamamlayaraq macarıstanlı futbolçunu Türkiyəyə gətirmək istəyir. 2020-23-cü illərdə ''Fənər''də top qovmuş 26 yaşlı müdafiəçi ötən yay 12,3 milyon avroya ''Hoffenhaym''a satılmışdı. Amma onun Almaniyada keçirdiyi ilk mövsüm çox uğursuz alındı.

''Hoffenhaym''da heç cür heyətə düşə bilməyən və cəmi 5 rəsmi oyunda forma geyən Salai, qışda ''Frayburq''a icarəyə verildi. Burda da özünü göstərə bilməyərək yalnız 3 oyun keçirdi. Macarıstan yığmasında da əsas heyətdəki yerini itirən Salainin ''Hoffenhaym'' ilə 2027-yə qədər müqaviləsi var.

ƏLİ