''Real'' ''Jirona''da çıxış edən sabiq futbolçusu Migel Qutyerresi geri qaytarmaq istəyir.

''As'' nəşrində yer alan xəbərə görə əslində 23 yaşlı sol müdafiəçi Karlo Ançelottinin planlarına daxil deyil. Sadəcə Madrid nəhəngi bu futbolçu sayəsində yaxşı gəlir əldə etməyi planlaşdırır.

Qutyerres 2022-nin yayında 4 milyon avroya ''Jirona''ya transfer olunmuşdu. Müqavilədəki xüsusi maddəyə görə ''Kral klubu'' futbolçunu 8 milyon avroya yenidən qaytara bilər. Amma digər klublar üçün təzminat məbləği 40 milyon avrodu. İndi ''Real'' Qutyerresi məhz 8 milyon avroya aldıqdan sonra elə bu yay ən azı 40 milyon avroya satmağı planlaşdırır. ''Jirona''nın heyətində öz oyunu ilə diqqət çəkməyi bacaran Qutyerresə Avropanın bir sıra önəmli klubları maraq göstərir.

''Transfermarkt''a görə dəyəri 25 milyon avro civarında olan Qutyerresin ''Jirona'' ilə 2027-yə qədər müqaviləsi var. O, Kataloniya klubunda indiyə qədər 77 rəsmi oyunda forma geyərək 4 qol, 13 məhsuldar ötürmə ilə fərqlənib.

ƏLİ