“Komandada daha əvvəl də çalışmışam. İcazənizlə fikrimi ətraflı izah edim. Bu yola Azər Həşimovla çıxmışam. “Mingəçevir”də ilk dəfə bu mütəxəssisin rəhbərliyi altında işləmişəm. Və onlardan hansısa hörmətsizlik görməmişəm. O vaxt Azər müəllim mənimlə görüşdü və bildirdi ki, qapıçıların transferi, ümumi hazırlıq səviyyəsi və performansı mənim məsuliyyət daşıdığım məsələdi və məndən lazımi hesabatlar tələb edəcək. “Baş üstə” deyib işimi gördüm. Ortaya yaxşı nəticələr də çıxardıq. Daha sonra Şəhruz Mustafayevlə birgə çalışdım. Mənə dedi ki, qapıçılarla bağlı nəyəsə qarışma! Ardınca Sönməz Quliyevlə işlədim. Sönməz müəllimlə də Azər müəllimlə olduğu kimi razılaşdıq. Hətta “Şamaxı”ya qarşı matçda meydana çıxdım. Yadımdadı, həmin vaxt 8 il idi forma geymirdim. Şükür Allaha, həmin oyunda rəqibimizi evində məğlub etdik. Elə “Şamaxı”da Ramiz Məmmədovla çalışanda da işlərim qaydasında idi. Hansısa hörmətsizlikdən söhbət gedə bilməz. Nəticədə ölkə futboluna Abdulla Seydəhmədov kimi qapıçı qazandırdıq. Yəni bu komanda da mənimlə işbirliyi etdi. Amma “Mingəçevir”də fərqli oldu. Bəli, o vaxt Ədəhim Niftəliyev qapıçı Toğrul Məhəmmədəliyevi də kollektivdən uzaqlaşdırdı. Əvəzində Mövlan Kərimovu gətirdi. Mənə dedilər ki, sən gəl məşqini keç, evinə get, başqa nəyəsə qarışma. Nə etirazım işə yaradı, nə də sözümü dinləyən oldu. Həmin vaxt bildirdim ki, Mövlanı araşdırmışam, haqqında yaxşı sözlər deyilmir. “Mingəçevir” onunla uğur qazana bilməyəcək. Dinləyən olmadı. Dedilər ki, belə olmalıdı. Rəhbərlik də məni çağırıb bildirdi ki, Ədəhim bəy nə deyirsə, odu. Yəni bu transferin baş tutmasında və Mövlanın “Mingəçevir”in formasını geyməsində hansısa rolum olmayıb, sadəcə məşq keçmişəm. Həmin vaxt Torğulun komandadan uzaqlaşdırılmasının yanlış addım olduğunu demişdim. Ümumiyyətlə, lazımi qurumlardan bu məsələnin ətraflı araşdırılmasını, günahkarlar varsa, cəzalandırılmasını xahiş edirəm. Amma qəti qərarla. Futboldan uzaqlaşdırılanlar gələcəkdə hansısa yollarla gəlib bu sahədə çalışmasın. Elə insanlar futoblumuza xeyir verə bilməz. Onların “futbol” ifadəsini işlətməsi belə qadağan edilməlidi. İfadəmə görə üzr istəyirəm, amma oyunu satmaqla, onminlərlə əhalisi olan şəhərin adına ləkə gətirməklə şərəfini satmaq eynidi. Bu məsələni araşdıranlara, xüsusilə hüquq-mühafizə orqanlarına çox təşəkkür edirəm. Onu da deyim ki, sonuncu klubdaxili iclasda iştirak etməmişəm. Orda nələrin yaşandığından xəbərim yoxdu”.