“Mingəçevir”in baş məşqçisi Ədəhim Niftəliyevlə yolları ayırması komandayla bağlı futbol ictimaiyyətində səs salan xəbərlərin yayılmasıyla müşayiət edildi. Danışılmış oyunlar, saxlanılan futbolçular, gözlənilən yeni baş məşqçi təyinatı, yeni illə birgə gələn sponsor və s... Diqqəti çəkən əsas məsələ isə sabiq çalışdırıcının içində biz də olmaqla mətbuata verdiyi ilginc açıqlamalardı.

Qısası, Niftəliyev ayrılığın yalnız şifahi şəkildə baş tutduğunu, yekun qərarın Bakıdakı rəhbərliklə görüşdə bəlli olacağını dedi. Baxmayaraq ki, klubun rəsmi sosial şəbəkə hesabında dərc edilən məlumatda vidalaşmanın qarşılıqlı razılıq əsasında olduğu qeyd edilib. Belədə məsələni araşdırmağı lazım bildik və ortaya cəlbedici bilgilər çıxdı.

“Football-plus.az” məlumat əldə etdi ki, mütəxəssisin “Bakıdakı rəhbərlik” adlandırdığı şəxs Ayaz Əliyevdi. Söhbət İqtisadiyyat Nazirliyində Aparat rəhbəri vəzifəsində çalışan şəxsdən gedir. Elə “Mingəçevir”də əsas söz sahibi də odu. Sadəcə, Ayaz bəy yaxın dostu Nurlan Əhmədovu İdarə Heyətinin sədri seçməklə özünü pərdə arxasında saxlayıb. O başqa məsələ ki, Əliyev indi Niftəliyevlə görüşmək niyyətində deyil.

Mənbəmizin verdiyi məlumata görə, Ədəhim bəyin komandada yaratdığı xoşagəlməz ab-hava, mətbuatda yayılan xəbərlər, kollektivin sonuncu pillədə qərarlaşması, “nur şəhəri”nin təmsilçisində yaşanan şübhəli ayrılıqlar mübasibətlərin soyuqlaşmasına səbəb olub. Elə bu məsələlər Niftəliyevin “Mingəçevir”dən uzaqlaşdırılmasıyla nəticələnib.
Hər halda, hər kəs AFFA-nın danışılmış oyunlarla bağlı davam etdirdiyi araşdırmanın sona çatmasını və yekun qərarın açıqlanmasını gözləyir. Ədəhim bəyin ümidləri isə puç olmaqdadı. Başqa sözlə, onun üçün “Mingəçevir” məsələsi sona çatıb. Sadəcə, bunu özü etiraf etməlidi.

Edəcəkmi? Başqa yolu yoxdu. O özü də hər şeydən xəbərdardı!

KƏNAN BAHADIR