Məlum olduğu kimi, “Mingəçevir” dünən baş məşqçi Ədəhim Niftəliyevlə vidalaşdı. İndi “nur şəhəri”nin təmsilçisinin yeni çalışdırıcısının kim olacağı maraqlıdı. Bəllidi ki, komandanı təhvil alacaq mütəxəssisin qarşısına qoyulan hədəf sonuncu pillədən qurtulmaq olacaq.

“Football-plus.az”ın əldə etdiyi məlumata görə, artıq 1-ci liqa təmsilçisi namizədlərlə danışıqlara start verilib. Belə ki, indiyə qədər Azər Həşimov və Samir Məmmədovla əlaqə saxlanılıb. Kollektiv həm maliyyə, həm də qarşıya qoyulan hədəflə bağlı şərtlərdə bu iki məşqçidən biriylə razılaşmaq niyyətindədi. Hələ ki hadisələrin axarı Həşimovu nişan verir. Yəni prosesin davamında hansısa ciddi dəyişiklik yaşanmasa, Azər bəylə müqavilə imzalanacaq.

Qeyd edək ki, “Mingəçevir”in bu yöndə daha diqqətli davranmaq üçün vaxtı var. Komandanın yeni baş məşqçisinin yanvarın ilk günlərində dəqiqləşəcəyi gözlənilir.

KƏNAN BAHADIR