Ölkəmizdə daha bir klub danışılmış oyunlara görə gündəmdə! – rəsmi açıqlama
Bilindiyi kimi, premyer-liqada çıxış edən “Şamaxı”nın adı danışılmış oyunlarda hallanır. Hətta məsələ bu çərçivəyə sığmır. Dəqiq desək, mövzuyla bağlı AFFA səviyyəsində araşdırma aparılır.
Son günlərdə daha bir klubun adı bu siyahıya düşüb. Sadəcə, hər şey bu dəfə söz-söhbət səviyyəsindədi. Söhbət 1-ci liqada çıxış edən “Mingəçevir”dən gedir. Saytlardan birində tirajlanan xəbərə inansaq, “nur şəhəri”nin təmsilçisinin danışılmış oyunlarda iştirakıyla bağlı ciddi şübhələr var. Hətta bu üzdən UEFA-dan AFFA-ya müraciət daxil olub.
Maraqlıdı, iddia həqiqətəuyğundusa, futbol qurumundan kluba hansısa bilgi verilibmi?
“Football-plus.az”ın sualını “Mingəçevir”in mətbuat xidmətinin rəhbəri Elnur Qasımov cavabladı:
“Danışılmış oyunlar məsələsi bizim qırmızı xəttimizdi. Bu barədə kluba hansısa məlumat daxil olmayıb. Belə hal haqda qurumlardan hansısa bilgi alsaq, istənilən yardımı göstərməyə hazırıq. Lakin xəbərlərin doğru olduğuna inanmaq istəmirik. “Mingəçevir” daim öz hesabına uğur qazanmağa çalışıb. Bəlkə də turnir cədvəlindəki mövqeyimiz bəzilərinin ağlına belə fikirlər gətirib. Ümid edirik ki, belə bilgilər həqiqətəuyğun deyil”.
Digər xəbərlər
