Konfrans Liqasında əsas mərhələyə yekun vuruldu.

“İstanbul BŞ” Belçikaya böyük ümidlərlə yollanmışdı. Başakşəhərlilərin taleyi öz əlində idi. Qələbə komandanı pley-offa daşıyacaqdı. Üstəlik rəqib də o qədər güclü deyildi. “Serkl Brügge” hər nə qədər avrokubok mövsümünü yaxşı keçirsə də, 16 komandalı Belçika çempionatında hazırda 15-ci pillədə qərarlaşıb. Yerli fanatlar oyuna o qədər də maraq göstərmədi. 25 minlik “Yan Breydel” stadionuna cəmi 7 min azarkeş gəlmişdi. İlk dəqiqələrdə meydan sahiblərinin topun dirəyə dəyməsi ilə nəticələnən hücumunu nəzərə almasaq, oyun əsasən qonaqların üstünlüyü şəraitində keçdi. Tərəflər həm ilk yarıda, həm də ikinci yarıda kifayət qədər fürsətlər yaratsalar da, fanatlar uzun müddət qol görmədi. Nəhayət, 74-cü dəqiqədə “İstanbul BŞ”nin əsas qol silahı Pyontek sağ cinahdan qurulan hücum zamanı Kresponun ötürməsindən sonra topu saxlamadan tora göndərdi. Amma ilk “8-liy”ə düşmək şansını davam etdirmək üçün ən azı 1 xala ehtiyac duyan “Serkl Brügge” məğlubiyyətdən qurtulmağı bacardı.

82-ci dəqiqədə Brunner baş zərbəsi ilə bərabərlik qolunu vurdu. Matçın son anları çox maraqlı alındı. “İstanbul BŞ” hücuma aludə olduğundan müdafiədə böyük boşluqlar buraxmağa başladı. “Serkl Brügge” ən 3-4 gözəl şansı boşa verdi və son saniyələrdə bunun güdazına gedə bilərdi. Standart zərbə zamanı hücuma qoşulan qapıçı Muhammed Şəngəzərin baş zərbəsindən sonra meydan sahiblərinin qapıçısı ikinci cəhddə topu tutdu. Bu bərabərlik başakşəhərlilər üçün məğlubiyyətə bərabər oldu. Çünki komanda xalını 6-ya yüksəldərək yalnız 26-cı pillə ilə kifayətlənməli oldu. “Serkl Brügge” isə topların daha yaxşı fərqinə malik olduğuna görə 8-ci pilləni tutdu və birbaşa 1/8 finala vəsiqə qazandı. Çağdaş Atanın komandasının builki avrokubok macərası beləcə 12-ci oyunda sonra başa çatdı. Komanda təsnifat mərhələlərini də nəzərə alsaq, bu 12 oyunu 6 qələbə, 4 heç-heçə, 2 məğlubiyyətlə tamamladı. “İstanbul BŞ” 4-cü turda evdə zəif “Petrokub”la oyunda son saniyələrdə qələbəni əldən verməsəydi, bəlkə də komanda KL-də çıxışını davam etdirə bilərdi...

Konfrans Liqası, əsas mərhələ, 6-cı tur
Serkl Brügge (Belçika) – İstanbul BŞ 1:1
Brunner, 82 – Pyontek, 74.
İstanbul BŞ: Muhammed Şəngəzər, Duarte, Ba, Opoku, Lima (Əmrə Kaplan, 90+3), Krespo (Pelkas, 87), Onur Ərgün (Həmzə Gürələr, 90+3), Kemen, Dəniz Türüc (Fiqeyredo, 81), Davidson, Pyontek.