Okan Buruk mövsümün ilk rəsmi oyununda əlinin altındakı ən optimal heyəti meydana buraxaraq irəli ucda, gözlənildiyi kimi, Barış Alpər Yılmaza şans verdi.

Süni örtüklü meydanda keçirilən qarşılaşmaya “Qalatasaray” daha yaxşı başlasa da, müdafiə xəttinin inamsız təsir bağışlaması gözdən qaçmadı. “Jalgiris”in əsas qol silahı, nigeriyalı forvard Oyevusi ilk yarıda iki real fürsəti boşa verdi. Qonaqlardan isə Yunus Akgünün zərbəsindən sonra top dirəkdən döndüsə, Barış Alpər də gözəl şansı əldən verdi. 2-ci hissə sürpriz qolla başladı. 14 qolla Litva çempionatında bombardirlər yarışına başçılıq edən Oyevusi Nelssonun kobud səhvindən sonra topu ələ keçirərək Musleranı məyus etdi. Amma bu qoldan sonra “Cim-Bom”un üstünlüyü bir qədər də artmağa başladı. Sonradan meydana çıxan oyunçuların da inamlı təsir bağışlaması ilə “sarı-qırmızılar”ın təzyiqi, nəhayət, bəhrə verməyə başladı. 75-ci dəqiqədə Oliveyranın arxa dirəyə asması zamanı hücuma qoşulan mərkəz müdafiəçisi Əbdülkərim Bardakcı başla topu tora göndərdi. Cəmi 3 dəqiqə sonra “Qalatasaray” 2-ci qolu da vurdu. Mertensin zərbəsindən sonra qapıçı komandasını xilas etsə də, Xəlil Dərvişoğlu önünə düşən topu boş qapıya göndərməkdə çətinlik çəkmədi. Beləcə 432 gündən sonra “Qalatasaray” forması ilə meydana çıxan 23 yaşlı forvard qayıdışını qolla qeyd etdi. Amma qalan müddətdə inadkar “Jalgiris” yenə Musleranın qapısı önündə təhlükələr yarada bildi.

Əsas vaxta artırılan 1-ci dəqiqədə litvalı fanatlar ayağa qalxdı. Donatas Kazlauskas cinah asması zamanı bir toxunuşla topu tora göndərərək yekun nəticəni müəyyənləşdirdi. Sarı vərəqəsi olan 29 yaşlı futbolçu qol sevinci zamanı formasını çıxardığı üçün 2-ci sarı vərəqəni alaraq meydandan qovuldu və cavab oyunu ərəfəsində cəzalı duruma düşdü. Beləliklə, Türkiyə çempionunun builki ÇL macərası bərabərliklə start götürdü. Cavab oyunu avqustun 2-də İstanbulda keçiriləcək. Onu da bildirək ki, Türkiyə UEFA-nın əmsallar cədvəlində hazırda 12-ci pillədədi. Vilnüsdəki bərabərliklə “Qalatasaray” 0,5 əmsal qazandı. Türkiyənin bu il avrokuboklarda 4 təmsilçisi olduğu üçün bu əmsal 4 yerə bölündü. Yəni 0,125 əlavə olunmaqla Türkiyənin hazırda 26,725 əmsalı var. Türkiyə çempionunun 2025/26-da birbaşa ÇL-in qrupuna vəsiqə qazanması üçün qardaş ölkə bu mövsümü ilk “10-luq”da tamamlamalıdı.

2-ci təsnifat mərhələsi, ilk oyun
Jalqiris (Litva) – Qalatasaray 2:2
Oyevusi, 47. Kazlauskas, 90+1 – Əbdülkərim Bardakcı, 75. Xəlil Dərvişoğlu, 78.
Qalatasaray: Muslera, Boe, Nelsson, Əbdülkərim Bardakcı, Anxelinyo (Dyubua, 84), Berkan Kutlu (Midtşö, 62), Oliveyra, Yunus Akgün (Morutsan, 73), Zanyolo (Xəlil Dərvişoğlu, 73), Kərəm Aktürkoğlu, Barış Alpər Yılmaz (Mertens, 61).

Faktlar
* “Qalatasaray” avrokuboklarda 303-cü oyununa çıxdı və 82-ci dəfə bərabərə qaldı (106 qələbə, 115 məğlubiyyət, top fərqi – 403:450).
* “Qalatasaray” ÇL-in təsnifat mərhələsində ümumilikdə 27-ci oyununu keçirdi. Komanda bu oyunlardan 17 qələbə, 7 heç-heçə, 3 məğlubiyyətlə ayrılıb (top fərqi – 63:31).
* “Qalatasaray” indiyə qədər 11 fərqli mövsümdə ÇL-in təsnifatında oynayıb. İstanbul nəhəngi bu 11 mövsümün 9-da qrup mərhələsinə qədər irəliləməyi bacarıb. Komanda yalnız 2008/09 və 2021/22 mövsümlərində təsnifat mərhələsini aşa bilməyib.
* “Qalatasaray” tarixində ilk dəfə avrokuboklarda Litva təmsilçisi ilə üz-üzə gəldi.
* “Qalatasaray” mövsümdə ilk, “Jalgiris” isə 29-cu rəsmi oyununu keçirdi. Hazırda Vilnüs təmsilçisinin rəsmi matçlarda məğlubiyyətsiz seriyası 12 oyuna bərabərdi (8 qələbə, 4 heç-heçə).
* “Qalatasaray”ın avrokuboklarda səfərdəki məğlubiyyətsiz seriyası 7 oyuna yüksəldi (2 qələbə, 5 heç-heçə). Komanda Avropada son səfər məğlubiyyətini 2021-ci ilin iyulunda ÇL-in 2-ci təsnifat mərhələsi çərçivəsində PSV ilə görüşdə yaşayıb (1:5).

ƏLİ