Ötən həftə keçirilən iki oyunla Türkiyə kubokunda 1/4 final mərhələsinə yekun vuruldu. Turnir bu mərhələdə əsas favoritlərindən birini – “Qalatasaray”ı itirdi. Nəhənglərdən yalnız “Fənərbaxça” yoluna davam edir.

Çərşənbə günü “Qalatasaray” “İstanbul BŞ”ni qəbul etdi. Bu komandalar arasında bu mövsüm superliqa qarşılaşmasında tarixi hesab qeydə alınmışdı. Belə ki, “Cim-Bom” səfərdə oynamasına baxmayaraq, 7 cavabsız qolla qalib gəlmişdi. Yəni başakşəhərlilər bu oyuna həm də qisas hissi ilə çıxmışdılar. Həmişəki kimi ev oyununda güclü azarkeş dəstəyinə malik olan “sarı-qırmızılar” üçün qarşılaşma yaxşı başlamadı. Artıq 5-ci dəqiqədə Kərəmin qolu zamanı VAR-da ofsayd qeydə alındısa, çox keçmədən Patrik Şiş qonaqları hesabda önə keçirdi. “Qalatasaray”ın bərabərlik qolunu ilk yarının ortalarında künc zərbəsi zamanı Kaan Ayhan vurdu. Klubun yeni transferlərindən olan bu mərkəz müdafiəçisi ilk qolunu vursa da, matçboyu inamsız təsir bağışlayaraq bir neçə dəfə səhvə yol verdi. Yarım saatın tamamında Fiqeyredonun ötürməsindən yararlanan Aleksiç başakşəhərlilərin 2-ci qolunu vurdu. İlk yarıda daha bir diqqətçəkən məqam qonaqların çılğın baş məşqçisi Əmrə Belözoğlunun qırmızı vərəqə alaraq tribunaya yollanması oldu. “Qalatasaray” fasilədən dərhal sonra əsas qol silahı İkardinin sayəsində 2-ci dəfə hesabı bərabərləşdirdi. Argentinalı forvard bu mövsüm 17-ci rəsmi oyunda 10-cu qolunu vurdu.

Yeri gəlmişkən, bu, həm də “Qalatasaray”ın “Nef Stadionu”nda rəsmi oyunlarda vurduğu 600-cü qol oldu. Amma son sözü yenə də qonaqlar söylədi. Superliqada 21 oyuna cəmi 2 qol vuran 22 yaşlı polşalı Şiş dublunu rəsmiləşdirərək qəhrəmana çevrildi. Okan Buruk məğlubiyyətdən qurtulmaq üçün əvəzetmələrə əl atsa da, 3-cü dəfə hesabı bərabərləşdirmək mümkün olmadı. Hərçənd son anlarda Qomis gözəl fürsət yaxaladı və topu dirəyə vurdu. “Cim-Bom” bu mövsüm 30-cu rəsmi oyunda ilk dəfə 3 top buraxdı. Maraqlıdı ki, 2018/19-da kuboku qazanan bu komanda ardıcıl 4-cü mövsümdü, nəinki finala, heç yarımfinala da adlaya bilmir. İstanbul nəhəngi ötən mövsüm 1/32 finalda “Dənizlispor”, 2020/21 və 2019/20-də isə 1/4 finalda “Alanyaspor” səddini aşa bilməmişdi. Çempion olmasına rəğmən, hələ ki ölkə kubokunu qazana bilməyən “İstanbul BŞ” isə tarixində 3-cü dəfə yarımfinala yüksəldi.

Cümə axşamı “Fənərbaxça” “Kayserispor”u qəbul etdi. “Fənər” fanatları, gözlənildiyi kimi, oyuna o qədər də ciddi maraq göstərmədilər. “Beşiktaş”la derbidəki fiaskodan sonra onların belə laqeyd münasibəti anlaşılandı. Stadiona gələnlərin bəziləri isə komandaya dəstək verməyə yox, yenə də rəhbərliyə və oyunçulara etirazını bildirmək üçün gəlmişdi. Hətta “Fənər” hesabı açandan, eləcə də 2 və 3-cü qolları vurduqdan sonra da tribunada “rəhbərlik istefa” şüarları eşidilirdi. Futbolçulardan isə ikinci hissədə meydana çıxan Arao ilə İrfan Can Kahveci fitə basıldı. Eləcə də görüşü qolsuz başa vuran Valensiya fit sədaları altında əvəzləndi. “Sarı-lacivərdlilər” ilk yarını Əmrə Morun dublu sayəsində 2:1 öndə bitirdilər. 1 saatın tamamında qapıçıdan topu oğurlayaraq tora göndərən Sərdar Dursun 101 günlük qol həsrətinə son qoydu. Yekun nəticəni gənc Arda Gülər müəyyənləşdirdi. Beləlilə, yarımfinalda “Fənərbaxça” “Sivasspor”la, “İstanbul BŞ” isə “Ankaragücü” ilə qarşılaşacaq. Yarımfinal mərhələsində qalib iki oyunla müəyyənləşəcək.