Ötən həftə Çempionlar Liqasında ilk 1/4 finalçılar müəyyənləşdi.

İlk oyunda evdə uduzan komandalardan nə “Brügge”nin geridönüşə gücü çatdı, nə də PSJ-nin. Səfərdə uduzub evdə qisas almalı olanlardan yalnız “Çelsi” qarşıya qoyulan hədəfə çatdı. 180 dəqiqə ərzində “Milan”ın qapısına yol tapa bilməyən “Tottenhem”in isə bu mövsümlük avrokubok macərası başa çatdı. Qeyd edək ki, 1/4 finalın digər iştirakçılarının adına önümüzdəki həftədə aydınlıq gələcək.

“Çelsi” üçün bu, faktiki mövsümün qalan hissəsinə intriqa və maraq qatmaq baxımından son şans idi. Çünki komanda digər turnirlərdə mübarizəni dayandırmış, premyer-liqada isə heç bir iddiası qalmamışdı. Elə Qrehem Potterin də uğursuzluq təqdirində istefaya göndəriləcəyi istisna edilmirdi. İlk yarını meydan sahiblərinin hesabına yazmaq olar. “Borussiya” topa daha çox sahib olsa da, yalnız Roysun cərimə zərbəsi ilə Kepanı narahat edə bildi. Əks-hücumlarda yaxşı təsir bağışlayan “Çelsi” isə rəqib müdafiəsini gərginlikdə saxlamağı bacarırdı. Epizodların birində “Stemford Bric” ayağa qalxmağa yaxın idi. Amma Havertsin yaxın küncə endirdiyi zərbə dirəyə tuş gəldi. “Zadəganlar”ın təzyiqi fasilə ərəfəsində bəhrəsini verdi. Sol cinahdan ötürməni qəbul edən Sterlinq “Borussiya”nın ikinci qapıçısı Mayeri topu tordan çıxarmağa məcbur etdi. Cütün taleyini həll edən qol ikinci hissənin əvvəllərində vuruldu. “Borussiya” fanatları bu epizoda görə, yəqin ki, Danni Makkelini hələ uzun müddət xatırlayacaq. Niderlandlı hakim əvvəlcə VAR-la məsləhətləşdikdən sonra topun Volfun əlinə dəyməsi üzündən penalti təyin etdi. Hərçənd premyer-liqanın özündə dəfələrlə belə epizodlar zamanı oyun davam etdirilib. Buna qədər karyerası ərzində dortmundlulara qarşı keçirdiyi 8 rəsmi oyunun hamısında qol həsrət qalan Haverts topu dirəyə nişanladı. Amma Makkelli yenə oyuna müdaxilə etmək qərarına gəldi. Zərbədən əvvəl hər iki komandanın üzvləri cərimə meydançasına daxil olduğundan, o, Havertsə ikinci şans verdi. Almaniya yığmasının üzvü yenə topu eyni küncə - qapıçıdan sola göndərdi və bu dəfə fürsəti boşa vermədi. İtiriləsi bir şeyi qalmayan “Borussiya” üstünlüyü ələ keçirərək irəli atıldı. Amma “arılar” real qol vəziyyəti yaratmaqda çətinlik çəkirdilər. Kepa faktiki sona qədər ciddi şəkildə oyuna qoşulmadı. Terziçin əvəzetmələri də bir işə yaramadı və meydan sahibləri özlərinə sərf edən hesabı qorumağa müvəffəq oldular. Düzdü, bu cür nəticənin ədalətli olub-olmaması ətrafında çox müzakirə aparmaq olar. Amma reallıq budu ki, “Borussiya” evə, “Çelsi” isə 1/4 finala yollandı!

Faktlar

* “Çelsi” 2023-cü ildə keçirdiyi 13-cü rəsmi oyunda cəmi 3-cü qələbəsini qazandı (4 heç-heçə, 6 məğlubiyyət). Komanda bu təqvim ilində ilk dəfə bir oyuna 1-dən artıq qol vurdu! Londonlular əvvəlki 12 qarşılaşmada cəmi 5 dəfə fərqlənmişdilər.
* Potter ÇL-in pley-offunda mərhələ adlayan cəmi 2-ci ingiltərəli məşqçi kimi tarixə düşdü. Daha öncə bunu 2010/11-də ''Tottenhem''in başında Harri Rednapp bacarmışdı.
* Potter ÇL-də bir mövsümün gedişində 5 qələbəyə sevinən cəmi 2-ci ingiltərəli məşqçi oldu. Daha öncə bunu 2002/03-də ''Nyukasl''ın başında Bobbi Robson bacarmışdı.
* ''Çelsi'' ÇL-in pley-offunda 5-ci dəfə ilk oyunda uduzduğu halda mərhələni adlamağı bacardı. Bu, turnirin rekordunun təkrarı deməkdi. ''Barselona'', ''Yuventus'' və ''Real'' da eyni göstərici ilə öyünə bilər.
* Sterlinq ÇL-də 27-ci qolunu vurdu. O, bu turnirdə ən məhsuldar ingiltərəli oyunçuların siyahısında yalnız Ueyn Runidən (30) geri qalır.
* ''Borussiya''nın rəsmi matçlarda 10 oyunluq qələbə seriyası qırıldı.
* ''Borussiya'' tarixində cəmi 3-cü dəfə avrokubokların pley-offunda ilk görüşdə evdə qalib gəldiyi halda mərhələni adlaya bilmədi.
* ''Borussiya'' İngiltərədə keçirdiyi ardıcıl 6-cı oyunda məğlub oldu.