Türkiyəli qapıçı Altay Bayındırın onsuz da uğurlu şəkildə davam etməyən ''Mançester Yunayted'' karyerası birdəfəlik bitmək üzrədi.

''San'' nəşrinin yazdığına görə Altayın son olaraq liqa kubokunda səfərdə ''Tottenhem''lə oyunda (3:4) sərgilədiyi zəif performansdan sonra onun üzərindən belə desək, xətt çəkildi. Manikunianlar qış transfer dönəmində Altayla vidalaşaraq onun yerinə Andre Onana ilə daha güclü rəqabət apara biləcək başqa qapıçı transfer edəcəklər.

Altay ötən həftəiçi ''Tottenhem''ə qarşı oyunda yeni baş məşqçi Ruben Amorimin qərarı ilə gözlənilmədən start heyətində meydana çıxmış və ümidləri doğrultmamışdı. Buraxılan qollarda inamsız təsir bağışlayan Bayındır xüsusilə 4-cü qol zamanı Son Hın Minin künc zərbəsindən asması zamanı topa toxuna bilməmişdi. Top birdəfəlik qapıya daxil olmuş və Son künc zərbəsindən ''Yunayted''ə qol vurmağın sevincini yaşamışdı. İngiltərədə ikinci mövsümünü keçirən 26 yaşlı qapıçı indiyə qədər ''qırmızı şeytanlar''ın heyətində 4 rəsmi oyunda meydana çıxaraq 8 qol buraxıb.

Altayın qışda başqa kluba icarəyə veriləcəyi güman edilir. Onun vətəninə qayıtmaq ehtimalı yüksəkdi. İddialara görə ''Yunayted''in maraq göstərdiyi əsas qapıçı ''Lids''li İlan Melyedi. 22 yaşlı Fransalı qapıçı bu mövsüm çempionşipdə iştirak etdiyi 22 oyunun 12-də qapısını toxunulmaz saxlayıb.

Gündəmdə olan digər qapıçı isə ''Botafoqo''lu Con Viktordu. 28 yaşlı qapıçı bu mövsüm Libertadores Kubokunu qazanan ''Botafoqo''nun heyətində 51 oyunda forma geyərək bunların 22-də qapısını toxunulmaz saxlayıb.

ƏLİ