Altay Bayındır “Yunayted”ə Əli Koç sayəsində keçib?
Altay Bayındırın meneceri Səfa Seyrək 25 yaşlı qapıçı ilə bağlı səslənidirilən son fikrə etirazını bildirib.
"Football-plus.az" xəbər verir ki, məlum olduğu kimi, Bayındır sentyabrın əvvəllərində bonuslarla bilrikdə 7 milyon avro qarşılığında “Fənərbaxça”dan İngiltərə nəhəngi “Mançester Yunayted”ə transfer olundu. Bununla da Altay ”Yunayted”də forma geymiş ilk türkiyəli futbolçu kimi tarixə düşdü. Bu arada Türkiyənin tanınmış futbol şərhçisi və yazarlarından olan Sərdar Əli Çəliklərin Altay ilə bağlı səsləndirdiyi fikir müzakirələrə səbəb olub. Daha öncə də bir neçə dəfə qalmaqallı fikirləriylə diqqət mərkəzinə düşən 48 yaşlı Çəliklər bunları deyib:
“Əli Koç olmasaydı, Altay Bayındır heç vaxt “Mançester Yunayted”ə transfer olunmazdı. Koçun Qleyzerlər ailəsi ilə yaxşı münasibətlərdə olması Altayın İngiltərəyə yolunu açdı. Yoxsa, Altayın meneceri məhəllədə yetişənlərdən biridi. Düşünürsüz ki, danışıqları o aparırdı? Güldürməyin məni. Onun Qleyzerlər ailəsi ilə danışıqlar aparmağa səriştəsi və təcrübəsi yetməz! Bu transfer yalnız Əli Koçla Qleyzerlərin yaxın münasibətləri sayəsində mümkün oldu”.
Qapıçının meneceri Səfa Seyrək Sərdar Əli Çəliklərin cavabını bu sözlərlə verib:
“Uzun müddətdi sizin və başqa həmkarlarınızın açıqlamalarını qulaqardına vurmağa çalışırdım. Amma bu dəfə qısa da olsa, cavab verməyi lazım bildim. Ən sadə dildə desək, dünya futbolunun ən böyük klublarından birində ölkəmizi və bayrağımızı təmsil edən yığma üzvünə haqsızlıq edirsiz”.
Qeyd edək ki, Altay Bayındırın meneceri həqiqətən də futbol dünyasında populyar deyil. Altay ötən ilin əvvəllərinə qədər Mehmet Əli Çalışqanla çalışırdı. Amma sonradan Səfa Seyrəklə işləməyə başladı. Səfa Seyrəkin Altaydan başqa çalışdığı peşəkar futbolçu yoxdu!
Bu arada Altay Bayındırın “Yunayted”dəki durumu ilə bağlı maraqlı hadisələr yaşanmaqdadı. Məsələ burasındadı ki, fanatlar bu yay 43 milyon funt sterlinqə transfer olunan Andre Onananın performansından kəskin dərəcədə narazıdılar. “Qırmızı şeytanlar”ın sosial şəbəkədəki səhifələrində “Bavariya” ilə oyuna aid paylaşımlarda bir çox fanatın Onananın yerinə qapıda məhz Altay Bayındırı görmək istəməsi diqqəti çəkib. Kamerunlu qapıçının yeni klubunda işləri qaydasında getmir. Onana premyer-liqada ilk 5 tura 10 top buraxıb və ümidləri doğrultmur. Bu məqam Altayın yeni klubundakı debütünü tezləşdirə bilər. Ən pis halda sentyabrın 27-də türkiyəli qapıçını ilk dəfə iş başında görə bilərik. Həmin tarixdə “Yunayted” Liqa kuboku çərçivəsində “Kristal Pelas”ı qəbul edəcək.
Digər xəbərlər
