Həm Avropa arenasında, həm də daxili turnirlərdə yaxşı mövsüm keçirən “Fənərbaxça”da gözlənilməz problem ortaya çıxıb.

Football-plus.az xəbər verir ki, bu problem qapıçı Altay Bayındırla bağlıdı. 24 yaşlı istedadlı qapıçının klubla müqaviləsinin müddəti mövsümün sonunda, daha dəqiq desək, 2023-cü il iyunun 30-da başa çatacaq. İndiyə qədər belə güman olunurdu ki, tərəflər arasında danışıqlar prosesi zamanı ciddi fikir ayrılığı yaşanmayacaq. Yəni Bayındırın qısa müddət ərzində yeni müqaviləyə imza atacağı gözlənilirdi. Amma heç də belə olmayıb. Tərəflər heç cür yeni müqavilənin şərtləri ilə bağlı razılığa gələ bilmir! Bunun iki əsas səbəbi var. Türkiyə yığmasına da müntəzəm dəvət alan Altayın hazırda “Fənər”də illik qazancı 5 milyon lirədi. O, bu məbləğin 5 dəfə artırılaraq 25 milyon lirəyə yüksəldilməsini tələb edir. “Fənər” rəhbərliyi 20 milyon lirədən yuxarı çıxmaq niyyətində deyil. Digər problem müqaviləyə salınacaq təzminat maddəsidi. Altay müqaviləyə “10 milyon avro qarşılığında sərbəst qala bilər” maddəsini saldırmaq istəyir. Rəhbərlik isə bununla razılaşmır. Bu işin nə ilə yekunlaşacağı bəlli deyil. Bilinən yalnız odu ki, Altayın yanvarın 1-dən etibarən istənilən klubla danışıqlar aparmaq hüququ olacaq!

Bu arada “İnter” rəsmilərinin də Altayın durumu ilə maraqlandıqları məlum olub. İtaliya klubu bu əlcək sahibinin meneceri ilə əlaqə saxlayıb. Bayındır yalnız bir şərtlə - əsas qapıçı statusunda olacağı təqdirdə İtaliyaya getməyə razılıq verib. “İnter”də bu statusda olan kamerunlu Andre Onana heç də pis təsir bağışlamır. 2-ci qapıçı Samir Handanoviçin müqavilə müddəti bitmək üzrə olduğundan “neradzurra”ya əsasən ehtiyat qapıçı lazımdı. “İnter” Altay Bayındırla yanaşı, braziliyalı Neto və isveçrəli Yan Zommerə də maraq göstərir. Xatırladaq ki, “Ankaragücü”nün yetirməsi olan Altay Bayındır bu klubdan 2019-un yayında 1,5 milyon avroya “Fənər”ə transfer olunub. “Sarı-lacivərdlilər”də həmişə yerli qapıçılar populyar olub. Rüştü Rəcbərlə Volkan Dəmirəlin adını çəkmək kifayətdi. Yaxşı fiziki göstəricilərə malik olan və artıq indidən klubda kapitanlardan biri olan Altayın da uzun illər “Fənər”də çıxış edəcəyi proqnozlaşdırılırdı. Amma göründüyü kimi, bu “izdivac” erkən başa çata bilər. Altay bu mövsüm 24 rəsmi oyunda forma geyib. Bunların 12-də qapısını toxunulmaz saxlayıb və 25 qol buraxıb. Yeri gəlmişkən, belində ağrılar olan və “Fənər”in son 4 yoxlama matçını buraxan Altay klomanda ilə birlikdə Trabzona yollanıb. Bu gün “Trabzonspor”a qarşı oyunda onun start heyətində meydana çıxacağı gözlənilir.