Fernando Musleranın mövsümün sonunda 14 illik ''Qalatasaray'' karyerası başa çatacaq. Bu üzdən İstanbul nəhəngi qapıçı axtarışlarını davam etdirir.

Bununla bağlı ortaya sürpriz iddia atılıb. Türkiyə mətbuatının yazdığına inansaq, ''Cim-Bom'' ''Mançester Yunayted'' və Türkiyə yığmasının üzvü Altay Bayındıra maraq göstərir. Altay bilindiyi kimi daha öncə 4 il ''Fənərbaxça''nın şərəfini qorumuş və ötən ilin yayında 5 milyon avroya ''Yunayted''ə yollanmışdı. 26 yaşlı əlcək sahibinin İngiltərə karyerası uğursuz keçir. Andre Onananı heyətdən sıxışdıra bilməyən Bayındır ilyarım ərzində manikunianların heyətində cəmi 3 rəsmi oyuna çıxıb. O bir müddət öncə verdiyi müsahibədə gördüyü ən atəşli ab-havaya malik stadionlardan danışarkən ''Qalatasaray''ın da stadionunun adını çəkmişdi. ''Qalatasaray'' rəsmiləri Altayın transfer durumu və ''Yunayted''in tələb etdiyi məbləğ ilə bağlı məlumat toplayıblar.

Maraqlıdı ki, ''sarı-qırmızılar'' təzminat ödəyərək Altayı daimi əsasda transfer etsələr, onların ödədiyi məbləğin 20 faizi ''Fənərbaxça''ya çatacaq. Çünki ''Fənər''lə ''Yunayted'' arasında imzalanan müqavilə zamanı ora bu cür maddə salınıb. Altay minimum 10 milyon avroya transfer olunacağı təqdirdə isə ''Fənər'' 1 milyon avro qazanacaq. Ehtiyatda qalmaqdan bezən və ''Yunayted''dən ayrılmağın əleyhinə olmayan Altaya Şotlandiya nəhəngi ''Seltik'' də maraq göstərir.

ƏLİ