“Mövzuyla bağlı qaranlıq məqamlar çoxdu. Bəli, səbəbi düz qeyd etdiz. İş orasındadı ki, 2-ci liqa tam peşəkar deyil. “Birbaşa Bakı” isə peşəkar çempionatda çıxış edir. Üstəlik avrokuboklarda böyük uğurlar qazanır. Bu baxımdan, futbolçuların həmin komandaya üstünlük verməsi anlaşılandı. Bizim vəzifəmiz 2-ci liqanın durumunu düzəltməkdi. Sirr deyil ki, minifutbol istər şərait, istər maddi, istərsə də perspektiv baxımından 2-ci liqanı üstələyir. “Qusar” inkişaf etməyə çalışır. Maddi gücümüz çox zəifdi. 50 min manat pul verilir. Onun da vergisi, cərimələri ödəniləndə geriyə hansısa problemləri aradan qaldırmaq üçün lazım olan məbləğ qalmır. Təsəvvür edin ki, ötən oyunların birində azyaşlılar yağış yağdığına görə yerlərdən birində özünü soyuqdan qoruyub. Bu üzdən “Qusar” cərimələndi. Həmin cəriməni isə kabinetdə, isti otağında əyləşən biri təyin edir. O qədər məsələlər varki, müəyyən güzəştlər edilə bilər. Onsuz da 2-ci liqada çıxış edən klubların maddi gücü çox zəifdi. Bunu guya bilmirlər? İndi biz texniki məğlubiyyət alacağıq. Amma matçdan bir neçə gün əvvəl ardıcıl iki dəfə tarixin dəyişdirilməsiylə bağlı müraciətimiz oldu. Heç birini qəbul etmədilər. Niyə? Çünki “Qusar”a qarşı qərəz var. Çempionatda ayrı-seçkilik edilir. “Şahdağ Qusar” da bizimdi. Onlara əks fikir söyləmək istəmirəm. Doğma klubumuzdu. Amma heç kimin haqqı tapdalanmamalıdı. Kiməsə etiraz da edə bilmirik. Kimə edə bilərik ki? Çoxunun futboldan anlayışı yoxdu. Amma taleyüklü qərarlar verirlər. Onu bilirəm ki, matçın məhz dekabrın 18-nə təyin edilməsində xüsusi maraq var idi. İstəyirdilər ki, meydana çıxaq, “Şahdağ Qusar” bizə 5-6 qol vursun. Beləliklə, derbidə biabır olaq... Hamı yaxşı bilir ki, 2-ci liqada çıxış edən futbolçular başqa yerlərdə çalışır. Həftədə bir-iki dəfə işdən icazə alıb oyuna, məşqə çıxırlar. Futbolçu qıtlığı var. Mən Şahruddin Məhəmmədəliyevi yetişdirib “Sumqayıt”a verən adamam. Bizim biabır olmağımızı istəyənlər kimi yetişdirib? Futbola hansı faydanı veriblər?!”