“Rəqibi təbrik edirəm. Azər müəllim qısa vaxt ərzində yaxşı komanda formalaşdırıb. Fikirləşirəm ki, elitada "Kəpəz"i rahat saxlaya biləcək. Maraqlı oyun alındı. Əvvəldən də planlaşdırırdıq ki, “iki nömrə” kimi oynayaq. Daha çox müdafiədən oynamağı düşünürdük. Yaxşı müdafiə olunub, imkan düşdükcə əks-hücumlarda rəqibi tuta bilərdik. Fikirləşirəm ki, bu plan alındı. Sadəcə, bəzən keyfiyyət, bəzən bəxt amili bizim tərəfimizdə olmadı. Amma elita komandasına qarşı oynayırıqsa, ehtiyatlı olmalı və detallara fikir verməliyik. Biz də həftəboyu təhlillərə əsaslanıb işimizi ona uyğun qurmuşduq. Bizim də özümüzə görə iddiamız var. Liqamızda yuxarı pillələr üçün oynamağa çalışırıq. Birinci hissədə daha çox müdafiə olunduq. Rəqibə bir-iki şans verdik. Ciddi epizod olmadı. İkinci hissədə isə biz üstün idik. Əsasən də hücuma keçidlərdə. Dediyim kimi, elita komandaları bu baxımdan təhlükəli olurlar. Keyfiyyətli oyunçuları var. İstər legionerləri, istərsə də yerli futbolçuları güclüdü. Maksimal dərəcədə diqqətli olmaq lazımdı. Konsentrasiyanı bir dəqiqə itirsən, problem olacaq. Penaltı epizodunda olduğu kimi - müdafiədə buraxdığımız səhvdən həmin epizod yarandı. Penalti barədə danışmaq istəmirəm. VAR-da baxılandan sonra təyin edildi. Buna görə də hörmətlə yanaşırıq. Qarşıdakı oyunlara hazırlaşacağıq. Elitaya yüksəlmək üçün oyunları itkisiz başa vurmalıyıq. Diqqətimizi çempionata yönəltmişik”.