1-ci liqada çempionluğa iddialılardan olan "İmişli" heyətini gücləndirməyə davam edir.

Bölgə təmsilçisi "Turan Tovuz"un qapıçısı Mehman Hacıyevi mövsümün sonuna kimi icarəyə götürüb. Elita təcrübəsi olan qolkiper İmişli təmsilçisinə keçidiylə bağlı "Football-plus.az" saytına müsahibə verib.

- Ötən mövsüm "Turan Tovuz"un heyətində elitada debüt etdin, hətta penalti dəfn etməklə komandanın ən yaxşısı seçildin. Ümumilikdə götürəndə ötən mövsümü özün və komandan üçün necə qiymətləndirərdin?
- Ötən “futbol ili” mənim üçün maraqlı və xoş oldu. "Turan Tovuz"un yetirməsi kimi əsas komanda ilə elitada debüt etdim. İki oyunda şans qazansam da, uğurlu oldu. Ümumi götürəndə həm özüm, həm də komandam üçün uğurlu mövsüm keçdi.

- "İmişli"yə keçidin necə oldu? Özün istədin, yoxsa rəhbərlik əsas heyətə düşməkdə çətinlik çəkdiyini nəzərə alaraq 1-ci liqa təmsilçisinə icarəyə verdi?
- "İmişli"yə keçid həm öz istəyim, həm də Əsgər Abdullayev amili ilə bağlıdı. Əsgər müəllimlə rəhbərliyi altında 1-ci liqada əvvəllər də oynamış və çempion olmuşdum. Yəni onu yaxından tanıyıram. Yeni komandamda daimi oynamaq və özümü inkişaf etdirmək istəyirəm. Ona görə də düzgün seçim etdiyimi düşünürəm

- Bölgə təmsilçisində "1 nömrə" olacağına inanırsanmı?
- Bunu əvvəlcədən deyə bilmərəm. Amma üzərimdə maksimum çalışacam ki, daim qapıda dayanım. İnşaallah, bunu bacararaq komandama fayda verəcəm.

- “İmişli” 1-ci liqanın favoritlərindəndi, çempionluğa iddialıdı. Bu məqam sənə ayrıca motivasiya verirmi?
- Əlbəttə. Çempionluq üçün sona qədər döyüşəcəyik. Heyətimizdə yetərincə təcrübəli, yaxşı oyunçular var. Amma 1-ci liqa elə çempionatdı ki, yalnız səviyyəli oyunçularla yox, həm də döyüşkənliklə hamını qabaqlamalısan. Biz də bunun fərqindəyik. Ona görə hər oyuna sonuncu qarşılaşmamız kimi çıxıb 3 xal götürməliyik.

- Necə düşünürsən, "İmişli" ilə 1-ci liqanın çempionu kimi elitaya yülsələ biləcəksizmi?
- Rəhbərlik, məşqçilər, futbolçular - hamımız bu amal uğrunda bir yumruq kimi birləşməliyik. İnşallah, çəkdiyimiz əziyyət, tökdüyümüz tər boşuna olmayacaq və çempion kimi elitaya qalxacağıq.

ABDULLA İSMAYILOĞLU