“Baku Fire” futzal üzrə yüksək liqanın ilk 5 turunda 5 qələbə qazandı və birinci dövrəni şəriksiz lider kimi bitirdi.

Paytaxt təmsilçisinin baş məşqçisi Teymur Eyvazovla bununla bağlı danışdıq. Mütəxəssislə komandasının uğuru, futzalımızın ümumi durumu və başqa məsələlər ətrafında söhbətləşdik.

– Teymur bəy, ilk 5 turu necə xarakterizə etmək olar?
– Gözlənildiyi kimi, əsas rəqiblərimiz yenə “Araz-Naxçıvan”la “Neftçi” oldu. Yuxarı pillələrdəki komandalarla aşağıdakıların nəticələri və potensialı arasında uçurum var. İlk 5 matçı çox uğurlu sayıram. Hədəflədiyimiz qələbələri qazanmışıq.

– Komandanız mövsümlərarası fasilədə çox güclənib, yoxsa əsas rəqibləriniz çətin dönəmdən keçir?
– Məncə, uğurun sirri heyətimizlə bağlıdı. Yola eyni futzalçılarla davam edirik. İllərdi bir yerdəyik. Mövsümün əvvəlində iki oyunçuyla yolları ayırdıqsa, iki transfer etdik. “Araz-Naxçıvan” və “Neftçi”də isə köklü dəyişikliklər oldu. Futzalda belə hadisələr, adətən, mənfi ab-hava yaradır, ümumi struktur pozulur. Bizim özünəməxsus proqramımız var ki, addımlar xüsusi plan əsasında atılır.

– Oyunlar keçdikcə zədəlilər və cəzalılar olur. Heyətiniz yetərincə genişdimi? Əsas rəqibləri məğlub etmək komandada arxayınlıq yarada bilərmi?
– Sadaladığımız məsələlər normal və gözləniləndi. Meydanda rəqabət və mübarizə varsa, belə hallar qaçılmazdı. Futzalçıların cəzalı duruma düşməməsi üçün lazımi tapşırıqlar verilir. Davranışlarına və danışıq tərzlərinə diqqət etməlidilər. Həmçinin oyun tərzinə məsuliyyətlə yanaşmalıdılar. Özlərini yaxşı aparmalıdılar. Həm məşqlərdə, həm də matçlarda zədədən qorunmalarına önəm veririk. Yeni mövsümdən peşəkar həkimlə anlaşmışıq. Zədəli olanda dərhal tibbi müdaxilə edilir və ən qısa zamanda meydana qayıtması üçün səy göstərilir. Psixoloji məsələlər də diqqətdə saxlanılır. Arxayınlaşdığını hiss etdiyimiz futzalçılarla söhbət edirik.

– Yüksək liqadakı komandalar arasında niyə bu qədər səviyyə fərqi var?
– Əsas səbəb maliyyədi. Komandaların o qədər maddi gücü yoxdu ki, istədikləri futzalçıyla anlaşsınlar. Belədə ya həvəskar, ya da aşağı yaş qruplarından bacarıqlı futzalçılarla meydana çıxırlar. Bu məsələlərlə federasiya ciddi məşğul olmalıdı. İstəyirik ki, güclü rəqiblərin sayı daha çox olsun. Ayda bir, ən yaxşı halda iki dəfə çətin oyun keçiririk. Hətta bəzi matçlar heç məşq xarakteri də daşımır. Elə rəqiblər var ki, məşqdən sonra istirahət etmədən onlarla oynayırıq və qalib gəlirik. “Baku Fire”, “Araz-Naxçıvan” “Neftçi” kimi kollektivlərin sayı artırılmalıdı. Federasiya da bu işdə maraqlı olmalıdı.

– Təbii ki, rəqiblərin zəif olması çempionun beynəlxalq arenadakı çıxışlarına mənfi təsir edir. Siz çempion olsaz, ölkəmizi layiqincə təmsil edə biləcəksizmi? Bunun üçün potensialınız varmı?
– Əsas rəqiblərlə hələ cəmi iki matç keçirmişik. Çempionluq haqda danışmaq tezdi. İndi yalnız ölkə çempionatını düşünürük. Qış fasiləsindən sonra əsas rəqiblər daha güclü olacaq. Məncə, çempion yalnız mayda bilinəcək.

– Sizcə, “Baku Fire”ın yüksək liqadakı varlığı ölkə futzalına nə qazandırır?
– İndiyə qədər böyük işlər görmüşük. Aşağı liqada da komandamız var (“Baku Fire 2” – red.). Həmin kollektivə gənc futzalçıları cəlb edirik. Özünü yaxşı tərəfdən göstərənləri yüksək liqaya gətiririk. Həm millilərimizə, həm də yüksək liqadakı komandalara oyunçular vermişik. İstərdim ki, digər kollektivlərin də aşağı liqada komandası olsun. Hazırda bundan artığını edə bilmirik...

– Sonda millimizlə bağlı durumu necə şərh edə bilərsiz?
– Azərbaycan futzalı eniş dönəmini yaşayır. Legionerlərin yığmanı tərk etməsindən sonra ciddi boşluqlar yaranıb. Çox çalışmalıyıq ki, yerli futzalçılar yetişdirək. Bunun üçün vaxt lazımdı. İnanıram ki, gənc nəsil tezliklə formaya düşəcək və yığmamızın uğurları üçün tər tökməyə başlayacaq.

KƏNAN BAHADIR