Bu gün futzal üzrə yüksək liqada 14-cü tura start verilir.

Bu dəfə oyunlar Bakı İdman Sarayında yox, “Olimpik Star”da və həmişəki kimi bir gün ərzində keçiriləcək. İlk oyunda “Araz-Naxçıvan” “Record club”u qəbul edəcək. Naxçıvanlılar ötən həftə ən yaxın izləyicisi “Baku Fire”ı yenib fərqi yeddiyə çatdırdı. Şəriksiz liderin autsayderlə oyunda çətinlik çəkməyəcəyi bəllidi. Ümumiyyətlə, Vitali Borisovun yetirmələri bu gedişlə çempionluğu erkən təmin edə bilər. Reza İbrahiminin komandası isə problemlər içində çabalayır. “Record club” bu dəfə də fantastik hesabla məğlub olsa, çoxu təəccüblənməyəcək.

İkinci matçda “Neftçi” İK U-19-la üz-üzə gələcək. Hacıbala Abdullazadənin komandası, demək olar ki, çempionluq uğrunda mübarizədən qopub. Yenə də hər ehtimalı nəzərə almaq və xal itkisinə imkan verməmək vacib məsələdi. Millimizin durumu isə ortadadı. “Record club”un rəzil durumuna baxıb özünə şükür edən gənclər mövsüm ərzində ciddi uğurla yadda qalmayıb. Vəziyyətin bu oyunda da davam edəcəyinə şübhəylə yanaşmaq absurd olar!
Tura “Baku Fire” – “Yasamal Bakı” qarşılaşmasıyla yekun vurulacaq. Teymur Eyvazovun yetirmələri ötən həftə liderlə həlledici oyundan üzüağ çıxa bilmədi. Xal itkisinə görə yaranan mənfi ab-havanı xoş əhval-ruhiyyəylə əvəzləmək üçün bu görüş ideal fürsət ola bilər.Çünki “Yasamal Bakı” U-19 və “Recod club” kimi rəqibləriylə bacarsa da, ilk “üçlük”də olanlara “dişini göstərə” bilmir. Ümumiyyətlə, 14-cü tur zəiflərin güclülərlə üz-üzə qaldığı gün kimi fərqlənəcək. Yüksək liqanın səviyyəsini nəzərə alsaq, indidən “Olimpik Star”dan xeyli qol səsi eşidilir!

29 fevral
Araz-Naxçıvan – Record club
“Olimpik Star”. Saat 13.30.

Neftçi İK – U-19
“Olimpik Star”. Saat 15.30.

Baku Fire – Yasamal Bakı
“Olimpik Star”. Saat 17.30.

Xal durumu: Araz-Naxçıvan – 34, Baku Fire – 27, Neftçi İK – 23, Yasamal Bakı – 14, U-19 – 6, Record club – 4.
Bombardirlər: Reza Abgoun (Neftçi İK) – 47, Kənan Manafov (Baku Fire) – 41, Rüstəm Bağırov (Yasamal Bakı) – 31.

KƏNAN BAHADIR