Bu gün futzal üzrə yüksək liqada 15-ci tura start veriləcək.

Oyunlar ənənəvi olaraq bir gün ərzində və Bakı İdman Sarayında keçiriləcək. İlk matçda “Record club” “Baku Fire”ı qəbul edəcək. Reza İbrahiminin komandasının çətin günləri bitmək bilmir. Mövsümün ən uğursuz komandası tədricən böyükhesablı məğlubiyyətlərə öyrəşir. Səbəb əsas oyunçuların yoxluğudu ki, bu problemin tezliklə həll olunacağı gözlənilmir. Yerli futzalçıların, demək olar ki, bir işə yaramadığı ortadadı. “Baku Fire”ın durumu da yaxşıya doğru getmir. O mənada kı, kollektiv hədəfinə uyğun nəticələr qazanmır. Belədə çempionluq, sadəcə, əlçatmaz hədəf çevirlə bilər. Teymur Eyvazov yetirmələrini qeyd-şərtsiz bütün oyunlarda qələbəyə kökləməlidi.

İkinci oyunda U-19 “Araz-Naxçıvan”la qarşılaşacaq. İlqar Aslanovun gənclərdən ibarət komandasının liderə qarşı necə çıxış edəcəyini təxmin etmək çətin deyil. Muxtar Respublika təmsilçisinin isə çatışmazlığı yoxdu. Vitali Borisov heyətini formalaşdırıb və qələbələrini sıralayır. Uğurlu seriya bu oyunda da davam etməsə, möcüzə sayılacaq. Tura “Yasamal Bakı” - “Neftçi” İK matçıyla yekun vurulacaq. Favorit Hacıbala Abdullazadənin yetirmələridi. Hər halda, “Yasamal Bakı”nın üzvləri də ümidini itirməməli və sona qədər döyüşməlidi.

7 mart
Record club – Baku Fire
Bakı İdman Sarayı. Saat 14.30.

U-19 – Araz-Naxçıvan
Bakı İdman Sarayı. Saat 16.30.

Yasamal Bakı – Neftçi İK
Bakı İdman Sarayı. Saat 18.30.

Xal durumu: Araz-Naxçıvan – 37, Baku Fire – 30, Neftçi İK – 29, Yasamal Bakı – 14, U-19 – 6, Record club – 4.
Bombardirlər: Reza Abgoun (Neftçi İK) – 52, Kənan Manafov (Baku Fire) – 43.
KƏNAN BAHADIR