Belçika yığmasının baş məşqçi vəzifəsində dəyişiklik gözlənilir. Domeniko Tedesko böyük ehtimalla tezliklə bu komandadakı işini itirəcək.

Onun istefaya göndəriləcəyini Saşa Tavolyeri xəbər verib. Jurnaistin X sosial şəbəkəsindəki hesabında yaydığı məlumata görə, Belçika Kral Futbol İttifaqının rəhbərliyi milli komandanın uğursuz çıxışı səbəbi ilə Tedeskonun müqaviləsini pozmaqda qərarlıdı. Belçika yığması yenicə sona çatan Millətlər Liqasında A liqasının 2-ci qrupunda Fransa və İtaliyadan sonra 3-cü yeri tutub. Bu nəticə isə komandanın A liqasındakı yerini qoruması üçün pley-off oyunlarında iştirakını qaçılmaz edir. Belçika gələn ilin martında B liqasında 2-ci yeri tutan Ukrayna ilə qarşılaşacaq.

Başqa bir belçikalı jurnalist Filipp Qerday Tedesko istefaya göndəriləcəyi halda yerli futbol qurumunun ona 1,45 milyon avro təzminat ödəyəcəyini bildirib. İtalyan mütəxəssisin Belçika Kral Futbol İttifaqı (BKFİ) ilə müqaviləsinin müddəti 2026-cı ilin yayına qədər nəzərdə tutulub. Maraqlıdı ki, Qerday eyni zamanda BKFİ-nin maliyyə problemləri fonunda Tedesko ilə əməkdaşlığı vaxtından əvvəl pozmağa cürət etmədiyini də vurğulayıb.