Yığmamızın AÇ-2024-ün seçmə turnirindəki rəqiblərindən olan Belçika millisinin yeni baş məşqçisi müəyyənləşib.

Football-plus.az xəbər verir ki, bir müddət əvvəl bu mövzuda yayılan xəbər doğru çıxıb.

Yerli və beyəlxalq mənbələr komandanı Domeniko Tedeskonun çalışdırmaq şansını yüksək dəyərləndirmişdi. Belçika Kral Futbol Assosiasiyası (BKFA) artıq rəsmi məlumat yayıb.

37 yaşlı italyan məşqçi ilə müddəti AÇ-2024-ün final mərhələsinin sonunadək nəzərdə tutulan müqavilə imzalanıb. Tedesko yeni vəzifədə DÇ-2022-dəki uğursuzluğa görə istefaya yollanan ispaniyalı Roberto Martinesi əvəzləyib.

Yeri gəlmişkən, yığmamız Belçika ilə sentyabrın 9-da Bakıda, noyabrın 19-da isə Brüsseldə qarşılaşacaq.

Məşqçilik karyerasına 2017-ci ildə “Ertsgebirge”də başlayan Tedesko “Şalke-04” (2017-19), “Spartak” (2019-21) və “Leyptsiq”i (2021-22) də çalışdırıb. Onun yeni komandadakı debütü AÇ-2024-ün seçmə turnirinin martın 24-də keçiriləcək İsveçlə oyununa təsadüf edəcək. Gənc mütəxəssisin BKFA-nın rəsmi saytına təyinatıyla bağlı açıqlaması belə olub:

“Belçika millisinin baş məşqçisi təyin olunmaq mənim üçün böyük şərəfdi. Yeni komandada işə başlamağı səbirsizliklə gözləyirəm və çox motivasiyalıyam. Belçika futbolunun rəsmiləri ilə ilk görüşümdən məndə xoş hisslər oyanmışdı”.

BKFA-nın idman direktoru Frenk Verkauteren isə təyinatla bağlı belə deyib: “Baş məşqçi postu üçün namizədlərimiz çox idi. Onların hər biri bizə öz oyun fəlsəfəsi ilə bağlı məlumat vermişdi. BKFA Domeniko Tedeskonun xeyrinə seçim etdi. O, oyun üslubuna görə baş məşqçi vəzifəsinə ən maraqlı namizəd idi. Seçimi də məhz onun üstünlük verdiyi üsluba görə etmişik. Tedeskonun əsas vəzifəsi nə olacaq? Qələbə qazanmaq! İlk növbədə komandanı Avropa çempionatına çıxarmalıdı. Yığmamızın son illərdəki ambisiyalarını nəzərə alsaq, komandamız mümkün olduğu qədər yaxşı təsir bağışlamalıdı. İkincisi, heyətdə zəruri yerdəyişmələr etmək lazımdı. Bəzi oyunçular yaşa dolur, innovasiyalara hazır olmalıyıq. Yeni Belçika millisini göstərmək yeni çalışdırıcının işinin bir hissəsidi”.